İslam Azərbaycanda (İslam.Az)

İqdır sakinlərinə türk dilində nəşr olunmuş "İncil" və "İsa Məsih yolunda" CD diski paylayan 3 amerikalı turist polis tərəfindən saxlanıb. APA-nın məlumatına görə, araşdırma zamanı amerikalı turistlərin bundan əvvəl Van və Doğubəyazitdə də əhaliyə pulsuz "İncil" və CD-disk payladığı üzə çıxıb. İzahat alınandan sonra azadlığa buraxılan amerikalı turistlər ölkənin şərqində tarixi yerləri gəzmək niyyətində olduqlarını bildiriblər.

Oktyabrın 8-də Xuzistan əyalətinin islahatçı gənclərinin iftar mərasiminə qatılan "İslami İranın Müşarikət Cəbhəsi"nin siyasi büro üzvü höccətullah Mustafa Derayəti çıxışında ölkə rəhbərlərini yalançılıqda, riyakarlıqda və öz şəxsi maraqları üçün dindən sui-istifadədə günahlandırıb. "Media forum"un məlumatına görə, M.Derayəti deyib: "Öz işlərini yalan əsasında quranlar, xəyanəti özləri üçün peşə seçənlər hər gün dindarlıq iddiası edir və müsəlmançılığa etiqad etdiklərini gözə soxurlar. Hər şeyi özləri üçün istəyən iqtidarçılar islahatçıları xalqın içində nüfuzdan salmaq üçün yalandan dinsizlikdə və ölkəyə xəyanətdə günahlandırır".

İspaniyanın Kordoba şəhərində ATƏT təşkilatçılığı ilə islama qarşı diskriminasiya ilə mübarizəyə dair iki günlük konfransı başa çatıb. APA-nın məlumatına görə, konfransda çıxış edən ATƏT sədri, İspaniyanın xarici işlər naziri Migel Anhel Moratinos islama qarşı diskriminasiya ilə mübarizənin genişləndirilməsi üçün açıq və şəffaf dialoqu vacib sayıb. O qeyd edib ki, ATƏT üzvü olan 56 ölkənin hamısı islama qarşı qeyri-tolerantlıq faktlarına görə məsuliyyət daşıyırlar: "Biz hamımız terror aktlarının qarşısını almağa cəhd göstərməliyik, lakin islamla terroru eyniləşdirmək olmaz".

İftar yeməyinin sonunda şəhid ailələrinə hədiyyələr paylanılıb

Palmali Şirkətlər Qrupu Türkiyədə 1000 şəhid və qazi ailəsinə iftar süfrəsi açıb. Bu barədə Türkiyə mətbuatı məlumat yayıb. Məlumatda bildirilir ki, şəhid ailələri Türkiyənin torpaq bütövlüyü uğrunda canlarından keçmiş insanlara göstərdiyi diqqət və qayğıya görə, Palmali Şirkətlər Qrupunun prezidenti Mübariz Mənsimova təşəkkürlərini bildiriblər. Böyük rezonansa səbəb olan iftar yeməyinin sonunda şəhid ailələrinə hədiyyələr paylanılıb. Türkiyə mətbuatının yazdığına görə, iftar süfrəsində şəhid və qazi ailələri ilə birlikdə İstanbul valisi, İstanbul əmniyyət müdirləri və şəhər polis təşkilatının yüksək rütbəli zabitləri də iştirak ediblər.

Hadisə nəticəsində 12 nəfər yaralanıb

Əfqanıstanın Vardak əyalətində məscidlərin birində naməlum şəxslər iki nəfəri öldürüb, 12 nəfəri yaralayıblar. Associated Press agentliyinin məlumatına görə, beş döyüşçü pulemyotlarla dünən axşam məscidə gələnlərə atəş açıblar. Hadisədən sonra hücum edənlər naməlum istiqamətdə qaçıblar, onların axtarışı hələ ki, nəticə verməyib. Hazırda polislər hücumunu səbəblərini araşdırırlar. Verilən məlumata görə, ölənlər arasında yerli məktəblərdən birinin müəllimi də var.

"Quranı əzbər oxumaq" nominasiyası üzrə birinci yer Qırğızıstanın nümayəndəsi Abdulla Əkpərəliyə nəsib olub

Moskvanın Cümə məscidində 6-7 oktyabr tarixlərinə keçiriləcən "Quran" hafizlərinin VII beynəlxalq müsabiqəsinin qalibləri elan edilib. "Quranı əzbər oxumaq" nominasiyası üzrə birinci yer Qırğızıstanın nümayəndəsi Abdulla Əkpərəliyə nəsib olub. 2-ci və 3-cü yerləri isə Tatarastandan Ruşan Akşov və Abdulla Saydaraliyev əldə ediblər.

Berlində hər ay ən azı 15 alman islam dinini qəbul edir

Almaniyada yaşayan müsəlmanlar burdakı kilsələri satın alaraq məscid və islam mərkəzləri açırlar. Almaniyada nəşr olunan "Tagesspiegel" qəzetinin verdiyi xəbərə görə, Berlindəki 2 kilsə müsəlmanlara satılıb. Xəbərin davamında deyilir ki, katolik və protestanların sayı sürətlə azalır və təxminən 10 min kilsə yaxın günlərdə bağlanacaq. Bunun əvəzinə isə müsəlmanlar sürətlə çoxalır.

Oktyabrın 9-10-da İspaniyada "Müsəlmanlara qarşı dözümlülük və ayrı-seçkilik" mövzusunda konfrans başlayacaq. Hazırda ATƏT-ə sədrlik edən İspaniya tərəfindən təşkil olunan tədbir barədə bu gün Azərbaycanın Xarici İşlər Nazirliyinin mətbuat xidmətinin rəhbəri Xəzər İbrahim Bakıda keçirdiyi ənənəvi həftəlik brifinqdə məlumat verib.

Türk hakerlər ötən həftə ərzində İsveçdə 5 mindən artıq internet saytını dağıdıblar. APA-nın məlumatına görə, İsveçin internet provayder şirkətlərindən "Proinet"in mətbuat xidməti bu serverə bağlı 1,600 və digər serverdə olan 3,800 saytın türk hakerlər tərəfindən darmadağın edildiyini bildirir. Hakerlər bəzi saytlarda bütün məlumatlar bazasını silib, bir sıra saytlarda isə istifadəçilərə mesaj yazıblar.

Gürcüstanın patriarxı II İlya ölkədə konstitusiyalı monarxiyanın bərpası ideyası ilə çıxış edib. APA-nın Gürcüstan bürosunun xəbərinə görə, bu ideya bəzi müxalifət partiyaları tərəfindən dəstəklənib. II İlya hesab edir ki, ölkədə yaranmış şərait gürcü xalqının konstitusiyalı monarxiyanın bərpası ilə bağlı arzusunu gerçəyə çevirə bilər: "Biz Allaha dua edirik ki, Gürcüstan möhkəmlənsin, Gürcüstanda sabitlik yaransın və ölkə birləşsin.