İslam Azərbaycanda (İslam.Az)

"Düşünmürəm ki, vəhhabilik və buna bənzər hallar Azərbaycanda dini tolerantlığı sarsıdacaq gücə malikdir. Bu məsələlər xarakterindən asılı olmayaraq terror hadisəsidir. Buna terror hadisəsi kimi yanaşmaq və qiymət vermək lazımdır". APA-nın məlumatına görə, bunu jurnalistlərə açıqlamasında Milli Məclis sədrinin müavini Bahar Muradova bildirib.

Qaxda hicablı tərbiyəçi çalışdığı uşaq bağçasına buraxılmayıb. APA-nın Şəki-Zaqatala bürosunun məlumatına görə, 5 ildən çox Qax rayonunun Qorağan kənd uşaq bağçasında tərbiyəçi işləyən Rəmiyyə İsrafilova çarşab geyindiyi üçün Rayon Təhsil Şöbəsi (RTŞ) tərəfindən çalışdığı tərbiyə ocağından xaric edilib. Son 1 ildə çarşab taxdığını deyən R. İsrafilova bu günədək heç problemlə üzləşmədiyini bildirib. Lakin iki gün əvvəl çalışdığı uşaq bağçasının müdiriyyəti hicab geyinməsini irad tutaraq, baş örtüyünü çıxarmayacağı təqdirdə, bir daha işə gəlməməsi barədə göstəriş verib. Bağça müdiriyyəti bu göstərişin RTŞ müdiri Məmməd Xasıyev tərəfindən verildiyini bildirib.

Azərbaycan hüquq-mühafizə orqanlarının radikal dini qruplaşmalara qarşı keçirdiyi əməliyyatlarla əlaqədar ölkənin nəqliyyat sistemində təhlükəsizlik tədbirləri gücləndirilib. Bu barədə APA-ya Azərbaycanın Nəqliyyat Nazirliyindən məlumat verilib. Terror təhlükəsi və radikal dini qruplaşmalara qarşı keçirilən əməliyyatlarla əlaqədar hava, su və dəmir yolu nəqliyyatında fəaliyyət göstərən bütün müəssisələr, həmçinin böyük şəhərlərdəki avtovağzallar gücləndirilmiş rejimə keçib. Azərbaycan Dövlət Dəmir Yolunun (ADDY) mətbuat xidmətinin rəisi Nadir Əzməmmədovun APA-ya verdiyi məlumata görə, dəmir yolunun bütün müəssisələri və istehsalat birlikləri bu gün səhərdən gücləndirilmiş rejimdə işləyir: "Dəmir yolu vağzallarında və depolarda təhlükəsizlik tədbirləri gücləndirilib, şübhəli şəxslər və əşyaların yoxlanılması barədə göstəriş verilib. Bu, hüquq-mühafizə orqanlarının təhlükəsizlik tədbirini gücləndirmək barədə xəbərdarlığı ilə əlaqədardır".

Bakının ən qədim məscidlərindən biri olan "İmam Hüseyn" (Tövbə) məscidi təhlükə ilə üzləşib. Belə ki, məsciddən aşağı hissəsində tikilən yeni çoxmərtəbəli bina, tarixi məbəddə çatların meydana gəlməsinə səbəb olub. Binanın inşaatı ilə məşğul olanların sınaq üçün kiçik çatlara yapışdırdığı şüşələr sınaraq tökülüb. Bu da qədim məsciddə meydana gələn çatların hər gün daha da böyüməsindən xəbər verir.

Amerika Birləşmiş Ştatları Fələstin hökumətinə 400 milyon dollar məbləğində maddi yardım göstərmək niyyətindədir. İsrailin Fələstinə qarşı tətbiq etdiyi qadağalar isə Avropa İttifaqı və BMT-nin tənqidinə səbəb olub.

Bu gün saat 15.30 radələrində Nəsimi rayon Polis İdarəsinin 21-ci polis bölməsi tərəfindən ABŞ səfirliyinin qarşısından vəhhabi təriqətinə mənsub olduğu bildirilərək saxlanılan iki nəfər sərbəst buraxılıb. Polis bölməsindən APA-ya bildirilib ki, onlardan izahat alındıqdan sonra azad olunublar.

"Müdafiə Nazirliyinin "N" saylı hərbi hissəsinin zabiti, baş leytenant Kamran Əsədov özünün də daxil olduğu radikal vəhhabi qrupunun digər üzvləri ilə qabaqcadan əlbir olub cinayət əlaqəsinə girərək, xidmət etdiyi hərbi hissədən 4 ədəd avtomat silahı, 1 ədəd "PK" əl pulemyotu, 20 ədəd əl qumbarası, xeyli sayda avtomat silah üçün patron və hərbi ləvazimat oğurlayaraq hərbi hissəni özbaşına tərk edib. Kamran Əsədov və qrupun digər üzvləri oğurladıqları silah-sursatı və hərbi ləvazimatların bir hissəsini İsmayıllı rayonu ərazisində gizlətdikdən sonra Bakıya gəliblər".

Bakının Sabunçu və Əzizbəyov rayonlarında vəhhabi təriqətinə mənsub şəxslərin zərərsizləşdirilməsi məqsədilə əməliyyat keçirilir. Hüquq-mühafizə orqanlarındakı mənbələrdən APA-ya daxil olan məlumata görə, əməliyyatı Milli Təhlükəsizlik Nazirliyi yerli polisin köməkliyi ilə birgə keçirir. Məlumatda o da bildirilir ki, ayrı-ayrı şəxslərin evlərində axtarışlar aparılır, qanuna zidd əməllərdə şübhəli bilinən şəxslərin aşkarlanması istiqamətində tədbirlər görülür.

Azərbaycanın hüquq-mühafizə orqanları Heydər Əliyev adına Ali Hərbi Məktəbdə, Cəmşid Naxçıvanski adına hərbi liseydə keçirdiyi əməliyyat nəticəsində 10-dək zabit və kursant həbs olunub.

Amerika Birləşmiş Ştatlarının və Böyük Britaniyanın Azərbaycandakı səfirliklərinin fəaliyyətini məhdudlaşdırılması bu diplomatik korpuslara vəhhabi təhlükəsinin olması ilə bağlı məlumatlara əsaslanıb. Hüquq-mühafizə orqanlarındakı mənbənin APA-ya verdiyi məlumata görə, silahlı vəhhabilərlə bağlı əməliyyatların keçirilməsi səfirliklərin təhlükəsizliklərinin gücləndirilməsi ilə bağlı qərarın qəbuluna səbəb olub.