Bu gün saat 15.30 radələrində Nəsimi rayon Polis İdarəsinin 21-ci polis bölməsi tərəfindən ABŞ səfirliyinin qarşısından vəhhabi təriqətinə mənsub olduğu bildirilərək saxlanılan iki nəfər sərbəst buraxılıb. Polis bölməsindən APA-ya bildirilib ki, onlardan izahat alındıqdan sonra azad olunublar.

Qeyd edək ki, bunlar Çingiz Valeh oğlu Rəfibəyli və Mobil İsmayıl oğlu Cəbrayılovdur. Hər iki şəxs səfirlikdən polisə daxil olan müraciət əsasında saxlanılıb. Saxlanılanların hər ikisi saqqallı olub. Onların səfirliyin qarşısında hansı məqsədlə dayanmasının səbəbləri araşdırılır. Bölmədən o da bildirilib ki, səfirlik nümayəndələri şübhəli şəxslərin diplomatik korpusun binasının ətrafında görünmələrindən narahatlıq keçiriblər. Buna görə də ətrafda şübhəli görünən digər şəxslərin saxlanılması da istisna edilmir.

Qeyd edək ki, bu gün ABŞ və Böyük Britaniyanın Azərbaycandakı səfirlikləri fəaliyyətləri məhdudlaşdırılıb. Bu gün MTN APA-ya ABŞ səfirliyinə qarşı terror cəhdinin qarşısının alındığını təsdiqləyib.