İslam Azərbaycanda (İslam.Az)

Oktyabrın 8-də Xuzistan əyalətinin islahatçı gənclərinin iftar mərasiminə qatılan "İslami İranın Müşarikət Cəbhəsi"nin siyasi büro üzvü höccətullah Mustafa Derayəti çıxışında ölkə rəhbərlərini yalançılıqda, riyakarlıqda və öz şəxsi maraqları üçün dindən sui-istifadədə günahlandırıb. "Media forum"un məlumatına görə, M.Derayəti deyib: "Öz işlərini yalan əsasında quranlar, xəyanəti özləri üçün peşə seçənlər hər gün dindarlıq iddiası edir və müsəlmançılığa etiqad etdiklərini gözə soxurlar. Hər şeyi özləri üçün istəyən iqtidarçılar islahatçıları xalqın içində nüfuzdan salmaq üçün yalandan dinsizlikdə və ölkəyə xəyanətdə günahlandırır".

İspaniyanın Kordoba şəhərində ATƏT təşkilatçılığı ilə islama qarşı diskriminasiya ilə mübarizəyə dair iki günlük konfransı başa çatıb. APA-nın məlumatına görə, konfransda çıxış edən ATƏT sədri, İspaniyanın xarici işlər naziri Migel Anhel Moratinos islama qarşı diskriminasiya ilə mübarizənin genişləndirilməsi üçün açıq və şəffaf dialoqu vacib sayıb. O qeyd edib ki, ATƏT üzvü olan 56 ölkənin hamısı islama qarşı qeyri-tolerantlıq faktlarına görə məsuliyyət daşıyırlar: "Biz hamımız terror aktlarının qarşısını almağa cəhd göstərməliyik, lakin islamla terroru eyniləşdirmək olmaz".

Zaqatalanın mərkəzi bazarında fəaliyyət göstərən ibadət evində saqqallı şəxslərin namaz qılmasına qadağa qoyulub. Bu barədə APA-nın Şəki-Zaqatala bürosuna vəhhabi təriqətinin üzvü olmaqda günahlandırılan rayon sakinləri məlumat verib. Onların sözlərinə görə, Zaqatala rayon Polis Şöbəsinin sahə müvəkkili Nəsib Musayev bazarda ticarətlə məşğul olan dindarları toplayaraq, onlara saqqallarını qırxmaq tapşırığı verib. O, əks təqdirdə saqqal saxlayan dindarların ibadət evinə buraxılmayacağını bildirib.

Bu gün Bakının Qala kəndində "Mədəniyyətin qorunması üçün Səfir Fondu" layihəsi çərçivəsində Qala məscidinin bərpasına başlanması ilə bağlı tədbir keçirilib. APA-nın xəbərinə görə, məscid ABŞ-ın Azərbaycandakı səfirliyinin və Azərbaycan Mədəniyyət və Turizm Nazirliyinin dəstəyi ilə bərpa olunacaq. Tədbirdə iştirak edən ABŞ-ın Azərbaycandakı səfiri Ann Dersi bildirib ki, bu, səfirlik tərəfindən Azərbaycanda həyata keçirilən ikinci layihədir. İlk olaraq Qax rayonunun Qum kəndindəki məscidin bərpa olunmasına başlanılıb və ilin sonunadək orada işlər başa çatacaq. XVII-XVIII əsrlərə aid Qala məscidinin bərpasına isə 38 min dollar ayrılıb.

İftar yeməyinin sonunda şəhid ailələrinə hədiyyələr paylanılıb

Palmali Şirkətlər Qrupu Türkiyədə 1000 şəhid və qazi ailəsinə iftar süfrəsi açıb. Bu barədə Türkiyə mətbuatı məlumat yayıb. Məlumatda bildirilir ki, şəhid ailələri Türkiyənin torpaq bütövlüyü uğrunda canlarından keçmiş insanlara göstərdiyi diqqət və qayğıya görə, Palmali Şirkətlər Qrupunun prezidenti Mübariz Mənsimova təşəkkürlərini bildiriblər. Böyük rezonansa səbəb olan iftar yeməyinin sonunda şəhid ailələrinə hədiyyələr paylanılıb. Türkiyə mətbuatının yazdığına görə, iftar süfrəsində şəhid və qazi ailələri ilə birlikdə İstanbul valisi, İstanbul əmniyyət müdirləri və şəhər polis təşkilatının yüksək rütbəli zabitləri də iştirak ediblər.

Hadisə nəticəsində 12 nəfər yaralanıb

Əfqanıstanın Vardak əyalətində məscidlərin birində naməlum şəxslər iki nəfəri öldürüb, 12 nəfəri yaralayıblar. Associated Press agentliyinin məlumatına görə, beş döyüşçü pulemyotlarla dünən axşam məscidə gələnlərə atəş açıblar. Hadisədən sonra hücum edənlər naməlum istiqamətdə qaçıblar, onların axtarışı hələ ki, nəticə verməyib. Hazırda polislər hücumunu səbəblərini araşdırırlar. Verilən məlumata görə, ölənlər arasında yerli məktəblərdən birinin müəllimi də var.

"Quranı əzbər oxumaq" nominasiyası üzrə birinci yer Qırğızıstanın nümayəndəsi Abdulla Əkpərəliyə nəsib olub

Moskvanın Cümə məscidində 6-7 oktyabr tarixlərinə keçiriləcən "Quran" hafizlərinin VII beynəlxalq müsabiqəsinin qalibləri elan edilib. "Quranı əzbər oxumaq" nominasiyası üzrə birinci yer Qırğızıstanın nümayəndəsi Abdulla Əkpərəliyə nəsib olub. 2-ci və 3-cü yerləri isə Tatarastandan Ruşan Akşov və Abdulla Saydaraliyev əldə ediblər.

Səbir orta yolu tapmaq, bəla və əzab vaxtı dözmək, həyatın və dinin şərtləri qarşısında bezmədən, yorulmadan yola davam etməkdir. Səbir dinimizin ən çox istədiyi və əmr etdiyi əxlaqi qaydalardan biridir. Səbirdə məqsəd gözlənilməz hadisələr və həll edə bilmədiyimiz problemlər qarşısında həyəcanlanmadan, təşvişə düşmədən ağılla fikirləşərək doğru qərarlar verə bilməkdir. Ancaq səbir zülmə boyun əymək, vətən, namus və insan şəxsiyyətinə qarşı olan təhqirlərə dözmək mənasına gəlməməkdədir. Belə olan hallarda buna qarşı etiraz etməyən insanlar acizlik və qorxaqlıq nümayiş etdirmiş olurlar. "Ey iman gətirənlər. Səbir və dua ilə kömək diləyin. Çünki Allah səbir edənlərlədir" (Bəqərə, 153).

Ailəmizdən sonra ən yaxın əlaqə qurduğumuz insanlar, şübhəsiz ki, qonşularımızdır. İnsan olaraq cəmiyyət halında yaşadığımız üçün hər birimizin qonşumuz vardır. Onlar günün hər saatında müxtəlif səbəblərlə qarşılaşdığımız insanlardır. Buna görə də, haqlarına hörmət göstərməli olduğumuz insanların arasında qonşularımız ön cərgələrdə dururlar. Xüsusilə şəhər yerlərində, çoxmərtəbəli binalarda onlarla ailənin bir binanı, bir giriş-çıxışı bölüşdüyünü nəzərə alsaq, belə yerlərdə qonşuluq münasibətlərinin yüksək səviyyədə qorunub saxlanılmasının nə dərəcədə əhəmiyyətli olduğu ortaya çıxmış olar.

Onlar bizim ya cənnətimiz, ya da cəhənnəmimizdir

Hər bir insanın dünyaya gəlməsində, inkişaf edib yetişməsində, həyata hazırlanmasında ailənin əhəmiyyəti düşünüldüyündən daha çoxdur. Ailə, insan övladının həyatda qalmasını təmin edir, nəslin davam etməsinə xidmət edir. Lakin insan üçün ailənin əhəmiyyəti nə qədər böyükdürsə, ailə üçün də sevgi və hörmət şəraitinin əhəmiyyəti o qədər böyükdür.