İslam Azərbaycanda (İslam.Az)

"Hizbullah" lideri bunun müqabilində təşkilat üzvünün həbsdən azad edilməsini tələb edib

"Hizbullah" lideri Həsən Nəsrulla Livan telekanallarından birinə müsahibə verərək əsir götürülən yəhudi əsgərlərinin qaytarılması ehtimalının olduğunu deyib. "Hizbullah" lideri dənizdə boğulan yəhudi əsgərinin cəsədini təşkilat üzvünün həbsdən azad edilməsi və daha 2 üzvün cəsədinin qaytarılması qarşılığında dəyişdirməyə razı olduqlarını bildirib.

Dindarlar ocağın ətrafında dua edərkən alovlar formasını dəyişərək xalqı salamlayan papa siluetinə dönüb

Vatikan, II İohan Pavelin yanan ocaqda görünərək xalqı salamladığı iddia edilən foto şəklini Katoliklərə təqdim edib. Foto şəkil 6 ay əvvəl çəkilsə də, Vatikan bu barədə indiyə qədər susub. İddiaya görə bir qrup polşalı dindar II İohan Pavelin ölüm ildönümü tədbirində ocağın ətrafında dua edərkən, alovlar formasını dəyişərək xalqı salamlayan papa siluetinə dönüb. Bunu görən dindarlar daha da bərkdən dua etməyə başlayıblar.

Kondaliza Rays: "Üç təkallahlı din - İslam, xristianlıq və iudaizm region xalqlarını birləşdirmək iqtidarındadır"

ABŞ-ın dövlət katibi Kondaliza Rays İsa peyğəmbərin tarixi doğum yeri sayılan kilsəni ziyarət edib. Kondaliza Rays Peyğəmbəri sülhün şahzadəsi adlandırıb və Onun hələ də bizimlə yaşadığını qeyd edib. Kilsədə etdiyi çıxışında xanım Rays deyib ki, üç təkallahlı din - İslam, xristianlıq və iudaizm region xalqlarını birləşdirmək iqtidarındadır. Onun sözlərinə görə, bu dinlərin gücündən bölgə xalqlarını ayırmaq üçün deyil, birləşdirmək üçün istifadə etmək lazımdır.

"Heç kimin ağlı başqa dövlətə getməsin. Heç kim Azərbaycan dövlətində artıq hərəkət edə bilməz, heç bir artıq hərəkətə yol verilməyəcək"

APA-nın məlumatına görə, bunu Milli Məclisin I vitse-spikeri, Təhlükəsizlik və müdafiə məsələləri komissiyasının sədri Ziyafət Əsgərov vəhhabilərin Azərbaycandakı fəaliyyəti və son vaxtlar hüquq-mühafizə orqanları tərəfindən onlardan qanunsuz silah-sursatın aşkar edilməsi faktına münasibət bildirərkən deyib.

Oktyabrın 21-də Mədəniyyət və Turizm Nazirliyi, Konya Böyükşəhər Bələdiyyəsi, Azərbaycan Rəssamlar İttifaqı, Azərbaycan Yazıçılar Birliyi, Azərbaycan Milli Elmlər Akademiyası və "NAB Qrup"un təşkilatçılığı ilə Azərbaycanda Mövlana Cəlaləddin Rumi Günləri tədbirlərinə start veriləcək. APA-nın məlumatına görə, bu gün Bakıda adı çəkilən tədbirə həsr olunmuş mətbuat konfransı keçirilib.

Azərbaycan Milli Təhlükəsizlik Nazirliyi (MTN) və Sumqayıt şəhər Polis İdarəsi (ŞPİ) əməkdaşlarının Sumqayıtda keçirdikləri birgə əməliyyat nəticəsində Sumqayıtda bir evdə kirayədə yaşayan üç nəfər saxlanılıb. Hüquq-mühafizə orqanlarındakı mənbələrdən APA-ya daxil olan məlumata görə, saxlanılanlardan ikisi polisə müqavimətdə təqsirləndirilərək 15 sutkalıq inzibati cəzaya məhkum olunub. Bir nəfərə - Sumqayıt sakini Rafael Rəhimova qarşı isə Cinayət Məcəlləsinin 228-ci (qanunsuz silah saxlama) maddəsi ilə ittiham irəli sürülüb və barəsində həbs-qətimkan tədbiri seçilib. O, hazırda MTN-in istintaq təcridxanasında saxlanılır. Mənbə bildirib ki, Azərbaycanda terror törətməyə hazırlaşmaqda şübhəli bilinən ərəb əsilli bir nəfərin axtarışı isə hələ də nəticəsiz qalıb.

Kanadanın bir televiziyasında nümayiş olunan və uydurma bir amerikan şəhərindəki müsəlman icmasının həyatından bəhs edən "Çöllükdəki kiçik məscid" adlı komediya serialı Humanitar Fəaliyyət Sahəsində İnsan Haqları təşkilatının Nyu-York bölməsinin nüfuzlu mükafatına layiq görülüb. "Ortaq məxrəc axtarışında" adlanan bu mükafata əvvəllər Nobel laureatı Dezmond Tutu və ABŞ-ın keçmiş prezidenti Cimmi Karter kimi görkəmli xadimlər layiq görülüblər.

"İsrail" hakimiyyəti Qüds (Yerusəlim) şəhərində müsəlmanlar üçün müqəddəs olan "əl-Əqsa" kompleksinin məğrib qapısının yanında "arxeoloji qazıntı" adı altında aparılan qazıntı işlərini bərpa edir. Bu barədə Nazirliklərarası Komissiya göstəriş verib. Məlumatı news.ru internet saytı yayıb.

Polis dindarlardan dördünü həbs edib

Cəlilabad rayonunda vəhhabi cərəyanına məsub bir qrup şəxsin bir din xadimini təhqir etməsi bu günlərdə rayon sakinləri ilə qarşıdurmaya səbəb olub. Hadisənin şahidi olan şəxslərin "Turan"a bildirdiyinə görə, olay rayonun "İran bazarı" adlanan ərazisində baş verib və qarşıdurmaya səbəb din xadimlərindən biri buradan keçərkən bir qrup vəhhabinin onu "müşrik gedir, müşrik gedir" şəklində təhqir etməsi olub. Şahidlərin dediyinə görə, bundan sonra din xadimi bu adamlara nəzakətli olmağı tövsiyə etsə də, həmin şəxslər təhqiri davam etdiriblər.

Gürcüstanın Xalq Müdafiəçisi (Ombudsman) Sozar Subari Azərbaycanın İnsan Hüquqları üzrə Müvəkkili Elmira Süleymanovaya müraciət edib. APA-nın "Novosti-Qruziya" agentliyinə istinadən yaydığı məlumata görə, S. Subari məktubunda E. Süleymanovadan Azərbaycanın Qax rayonunda Müqəddəs Georgi pravoslav kilsəsinin bağlanmasının qarşısını almaqla əlaqədar tədbir görməyi xahiş edib. Müraciətdə bildirilir: "Gürcüstan kütləvi informasiya vasitələrində yayılan xəbərlərə görə, yerli əhali kilsənin qapılarını möhürləyib. Bunu kənd əhalisi ilə yanaşı, Nekres və Xeret mitropoliti Sergi ata da təsdiqləyib. Əldə olunan informasiyaya əsasən, əhali kilsədə xidmətin bərpa olunacağı təqdirdə, keşişi qisas almaqla hədələyir". Gürcüstan Ombudsmanı azərbaycanlı həmkarına bu hadisənin İnsan Hüquqları haqqında Avropa Konvensiyası ilə yanaşı, iki xalq arasındakı çoxəsrlik tarixə malik dostluq əlaqələrinə zidd olduğunu xatırladıb.