İslam Azərbaycanda (İslam.Az)

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadənin Tacikistana səfərinin yekunları ilə bağlı mətbuat konfransı keçirilib. APA-nın məlumatına görə, QMİ sədrinin müavini Hacı Sabir Həsənli bildirib ki, səfərin məqsədi "Əbu Hənifənin irsi və onun sivilizasiyalararası dialoqda rolu" mövzusunda keçirilən beynəlxalq simpoziumda iştirak etmək olub. Onun sözlərinə görə, Əbu Hənifənin 1310 illiyinə həsr olunan simpoziumda 40-dan artıq dövlətdən 500-ə qədər nümayəndə iştirak edib.

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadənin 60 ilik yubileyi, Şeyxülislamlıq fəaliyyətinin 30 illiyi ilə bağlı keçiriləcək tədbirlərdə iştirak etmək üçün xarici ölkələrin dövlət rəsmilərinə göndərilən dəvətlərin bir hissəsinə cavab verilib. APA-nın məlumatına görə, bunu QMİ sədrinin müavini Hacı Sabir Həsənli bildirib. Onun sözlərinə görə, Rusiya prezidenti, baş naziri və xarici işlər naziri, Tacikistan prezidenti və bir sıra dini xadimləri yubiley tədbirinə qatılacaqlarını bildiriblər. Hacı Sabir həmçinin, Çeçenistan, İran, Türkiyə, Latviya, Kabardin Balkar, Dağıstan, Səudiyyə Ərəbistanını, İordaniya, Orta Asiya ölkələrinin dövlət rəhbərlərinin, həmçinin din xadimlərinin, Roma Papası və bir sıra ictimai xadimlərinin dəvətlilər sırasında olduqlarını deyib.

"Yas mərasimləri ilə bağlı Naxçıvan Muxtar Respublikasında tətbiq olunan qayda bütün Azərbaycan üçün nümunədir". APA-nın məlumatına görə, bunu Qafqaz Müsəlmanları İdarəsinin (QMİ) sədr müavini Hacı Sabir Həsənli bu gün keçirdiyi mətbuat konfransında deyib. Hazırda Naxçıvanda yas mərasimlərində yalnız çay və xurma verildiyini qeyd edən S.Həsənli bildirib ki, əslində İslam dini və Azərbaycan əhalisinin maddi vəziyyəti də bunu tələb edir: "Bu vaxta qədər din xadimləri olaraq dəfələrlə bildirmişik ki, yas mərasimlərinin dəbdəbəli keçirilməsi israfçılıq deməkdir. İsrafçılıq edənlərin də bəhanəsi qonşudan daha yaxşı mərasim təşkil etməkdir. Burada ağıla gəlməyən meyvələr süfrəyə qoyulur. Hətta son vaxtlar VİP "palatka"lardan söhbət gedir. Bəyəm, İslam beləmi tələb edir? Digər İslam dövlətlərində belə şey yoxdur".

Azərbaycan paytaxtında Bakı və Xəzəryanı Yeparxiyanın bərpa olunmasının 10 illiyi ilə bağlı tədbirlər keçiriləcək. Yeparxiyadan APA-ya verilən məlumata görə, Muzey Mərkəzində "Bakı və Xəzəryanı Yeparxiya – 10 illik yol" adlı fotosərgi, Azərbaycan Dövlət Filarmoniyasında dini musiqilərin səsləndiriləcəyi konsert təşkil olunacaq. Jen-Mironosits kafedral kilsəsində isə ibadət keçiriləcək. Yubileylə bağlı yepiskop Aleksandrın mətbuat konfransı da planlaşdırılıb.

Bu il həyata keçiriləcək Həcc ziyarəti üçün sənəd qəbulu kvota dolana qədər davam etdiriləcək. Bu barədə APA-ya Qafqaz Müsəlmanları İdarəsinin (QMİ) sədr müavini Salman Musayev bildirib. QMİ-nin sədr müavini deyib ki, builki Həcc ziyarətinə zəvvarların yola salınmasına noyabrın 10-dan sonra başlanacaq.

Qafqaz Müsəlmanları İdarəsinin (QMİ) sədri, şeyxülislam Allahşükür Paşazadə oktyabrın 4-də Tacikistana gedəcək. QMİ-nin mətbuat xidmətindən APA-ya verilən məlumata görə, səfərdə məqsəd 5-6 oktyabr tarixlərində Düşənbədə keçiriləcək "Əbu-Hənifənin irsi və onun sivilizasiyalararası dialoqda rolu" mövzusunda beynəlxalq simpoziuma qatılmaqdır. Səfər 2009-cu ili "İmam Əbu-Hənifə ili" elan etmiş Tacikistan hökumətinin rəsmi dəvəti əsasında həyata keçirilir. Allahşükür Paşazadə tədbirdə məruzə ilə çıxış edəcək.

Həcc ziyarətinə getmək istəyən 20-dək şəxs mövsümi qripə qarşı peyvənd olunub. Bu barədə APA-ya Həcc ziyarətinə gedəcək zəvvarların peyvənd olunmasını həyata keçirən 20 saylı poliklinikanın peyvənd məntəqəsinin məsul həkimi Arzu Seyidli məlumat verib. Onun sözlərinə görə, artıq Qafqaz Müsəlmanları İdarəsinin nümayəndəsi poliklinikada olaraq Həccə gedəcək zəvvarların neçə peyvənd olunacağı ilə bağlı məsləhətləşmələr aparıb: "Həccə gedəcək zəvvarlar mövsümi qripə qarşı peyvəndləri özləri əldə etməli, biz isə sadəcə onları vurmalıyıq".

"Fatimeyi Zəhra" məscidinin dini icmasının qadın üzvləri bu gün Heydər Əliyev Fondunda olublar. İcmanın sədri Tofiq Rəzizadə APA-ya bildirib ki, icma nümayəndələri fondun səlahiyyətli şəxsləri ilə görüşüb, məscidin sökülməsi haqqında məhkəmə qərarı barədə məlumat veriblər. İcma üzvləri məhkəmənin qərarından hazırlanan şikayət ərizəsini fond təmsilçilərinə təqdim ediblər.

Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə Rusiya paytaxtına səfər edəcək. QMİ-nin mətbuat xidmətindən APA-ya verilən məlumata görə, səfərdə məqsəd sentyabrın 24-də Moskvada "Rusiya və İslam dünyası: stabillik naminə əməkdaşlıq" mövzusunda keçiriləcək beynəlxalq konfransda iştirak etməkdir. Rusiya Müftilər Şurasının təşkilatçılığı ilə keçiriləcək beynəlxalq konfransa Rusiya rəhbərliyinin nümayəndələri, ölkənin müsəlman subyektlərinin və beynəlxalq İslam təşkilatlarının rəhbərləri, görkəmli din və ictimaiyyət xadimləri dəvətlidirlər.

Azərbaycanda Ramazan bayramı ilə əlaqədar bayram namazı həm sentyabrın 20-si, həm də 21-də qılınacaq. APA-nın məlumatına görə, bu barədə Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadə bildirib. Şeyx deyib ki, Ramazan bayramının məhz hansı günə düşməsi ilə bağlı müxtəlif elmi araşdırmalar var.