İslam Azərbaycanda (İslam.Az)

Qafqaz Müsəlmanları İdarəsinin sədri Şeyxülislam Hacı Allahşükür Paşazadənin 60 illik yubileyi və QMİ sədri postunda fəaliyyətinin 30 illiyinə həsr olunmuş "Dinlərarası dialoq: qarşılıqlı anlaşmadan birgə əməkdaşlığa doğru" mövzusunda keçirilən iki günlük beynəlxalq konfrans bu gün öz işini davam etdirib. APA-nın məlumatına görə, Təzəpir məscidində keçirilən konfransa Dini Qurumlarla İş üzrə Dövlət Komitəsinin sədri Hidayət Orucov sədrlik edib. Rusiya Müsəlmanları Mərkəzi Ruhani İdarəsinin sədri Tolqat Tacəddin öz təbrik çıxışında bütün insanların və cəmiyyətlərin dialoq şəraitində yaşamasının vacib olduğunu deyib: "Amma təəssüf edirik ki, bu gün biz hələ də dialoqa hazır deyilik. Bu gün ənənəvi dinlərin dialoq və əməkdaşlıq mühitində yaşamasına böyük ehtiyac var. Həmçinin həm sünnü, həm də şiələrin qarşılıqlı anlaşması mühümdür. Necə ki, biz bunu Azərbaycanda, Qafqazda görürük. Bu gün bütün müsəlmanlar eyni problemləri yaşayırlar və biz birgə hərəkət etməliyik".

Moskva və Bütün Rusiyanın patriarxı Kirill Qafqaz Müsəlmanları İdarəsinin sədri, şeyxülislam Allahşükür Paşazadəni 1-ci dərəcəli "Şərəf və Şöhrət" ordeni ilə təltif edib. APA-nın məlumatına görə, A. Paşazadəni təbrik edən patriarx onun SSRİ-nin süqutu zamanı yaranmış qarışıqlıqda rus kilsəsi ilə dostluq əlaqələrini qoruduğunu xatırladıb: "Buna görə sizə minnətdarlığımı bildirirəm".

Rusiya prezidenti Dmitri Medvedyev Qafqaz Müsəlmanları İdarəsinin sədri Hacı Allahşükür Paşazadəyə zəng vuraraq onu anadan olmasının 60 illiyi və QMİ sədri postunda fəaliyyət göstərməsinin 30 illiyi münasibətilə təbrik edib.

İran prezidenti Mahmud Əhmədinejad Qafqaz Müsəlmanları İdarəsinin sədri Şeyxülislam Hacı Allahşükür Paşazadəyə təbrik məktubu göndərib. İranın Azərbaycandakı səfirliyindən APA-ya təqdim olunan məktubda deyilir: "Dinlərarası dialoq mövzusunda keçiriləcək konfransda iştirakla əlaqədar Cənabınız tərəfindən ünvanlanmış dəvətnaməni sevinc və məmnunluq hissləri ilə aldım. Bu konfransda şəxsən iştirak etməkdən şad və məmnun olardım. Lakin, öncədən planlaşdırılmış proqramlar mənə belə bir imkanı vermədi. Bununla belə öz təşəkkür və təbriklərimi yaxın dostum və müşavirim Hüccətülislam Vəlmüslimin Hacı Əli Əkbərinin vasitəsilə Sizə çatdırıram".

Qafqaz Müsəlmanları İdarəsinin (QMİ) sədri Allahşükür Paşazadənin 60 illik yubileyi və Şeyxülislam kimi fəaliyyətinin 30 illiyi münasibətilə keçiriləcək tədbirlərdə iştirak etmək üçün Bakıya gəlmiş qonaqlar bu gün Fəxri Xiyabanda Heydər Əliyevin məzarını ziyarət ediblər. APA-nın xəbərinə görə, Şeyxülislam Allahşükür Paşazadə, Dini Qurumlarla İş üzrə Dövlət Komitəsinin sədri Hidayət Orucov, Belarus patriarxı Filaret və digər şəxslər Heydər Əliyevin və akademik Zərifə Əliyevanın məzarları önünə əklillər qoyublar.

Minsk və Slutsk mitropoliti, bütün Belarusun patriarx ekzarxı Filaret bu gün Bakıya gəlib. Belarusun Azərbaycandakı səfirliyindən APA-ya verilən məlumata görə, səfərdə məqsəd Qafqaz Müsəlmanları İdarəsinin sədri Şeyxülislam Allahşükür Paşazadənin anadan olmasının 60, bu vəzifədə çalışmasının isə 30 illiyi ilə bağlı tədbirlərdə və dinlərarası dialoq mövzusunda konfransda iştirak etməkdir. Patriarxın prezident İlham Əliyev tərəfindən qəbul ediləcəyi də gözlənilir.

Moskva və bütün Rusiyanın patriarxı Kirill noyabrın 6-da Azərbaycana gələcək. APA-nın patriarxlığın saytına istinadən verdiyi məlumata görə, Kirill Qafqaz Müsəlmanları İdarəsinin sədri Allahşükür Paşazadənin 60 illik yubileyi və şeyxülislam kimi fəaliyyətinin 30 illiyi münasibətlər keçiriləcək tədbirlərə qatılacaq. O, Rus Pravoslav Kilsəsinin Bakı yeparxiyasında, həmçinin Azərbaycan prezidenti İlham Əliyevin qəbulunda da olacaq. Kirillin Bakıda bütün Gürcüstanın patriarxı II İlya ilə görüşü də nəzərdə tutulub.

Gürcüstan katalikos-patriarxı II İlya sabah Azərbaycana səfərə gələcək. APA-nın məlumatına görə, II İlyanı səfərdə böyük nümayəndə heyəti müşayitə edəcək. Patriarxın səfərində məqsəd Qafqaz Müsəlmanları İdarəsinin sədri Hacı Allahşükür Paşazadənin 60 illik yubileyinə həsr olunmuş mərasimdə iştirak etməkdir. Mərasimə qatılmaq üçün Moskva və bütün Rusiyanın patriarxı Kirill və digər din xadimlərinin də Bakıya gələcəyi gözlənilir.

"Azana heç kəs qadağa qoymayıb. Bundan söhbət belə gedə bilməz". Bu sözləri APA-ya açıqlamasında Qafqaz Müsəlmanları İdarəsinin mətbuat xidmətinin rəhbəri Rəhimə Dadaşova deyib.

Həcc ziyarətində iştirak etmək istəyən zəvvarlar üçün sənəd qəbulunun müddəti daha bir neçə gün uzadılıb. Bu barədə APA-ya Qafqaz Müsəlmanları İdarəsinin (QMİ) mətbuat xidmətinin rəhbəri Rəhimə Dadaşova bildirib. Mətbuat xidmətinin rəhbəri deyib ki, sənəd qəbulu üçün elan olunan vaxt noyabrın 1-də başa çatsa da, yerlər dolmadığına görə müddətin uzadılması qərara alınıb.