İslam Azərbaycanda (İslam.Az)

Azərbaycanın Abşeron rayonunun Mehdiabad qəsəbəsində olan məscidin bağlanması ilə bağlı yayılan məlumatlar həqiqətəuyğun deyil. Bu barədə APA-ya Dini Qurumlarla İş üzrə Dövlət Komitəsinin mətbuat xidmətindən məlumat verilib. Mətbuat xidmətindən bildirilib ki, hazırda məscid fəaliyyətini davam etdirir: " Məscidin fəaliyyətinin dayandırılması nəzərdə tutulmayıb".

Qafqaz Müsəlmanları İdarəsinin (QMİ) sədri Şeyxülislam Hacı Allahşükür Paşazadə İranın Prezident Administrasiyasının rəhbəri Rəhim Məşaini qəbul edib. APA-nın məlumatına görə, tədbirdə QMİ sədri İran və Azərbaycan xalqlarının dost və qardaş olduğunu deyib. Şeyx bildirib ki, iki ölkə düşmən qarşısında bir-birinə arxa olub: "İranın öz müstəqilliyini qoruması bizim üçün örnəkdir. İnanırıq ki, Azərbaycanın ərazi bütövlüyünün təmin olunmasında da İran öz dəstəyini əsirgəməyəcək. Həqiqət həmişə üstün olub. Bizim dost olmağımızı istəməyən qüvvələr var. Ancaq bizi birləşdirən dəyərlər çoxdur".

Bu gün Ailə, Qadın və Uşaq Problemləri üzrə Dövlət Komitəsinin (AQUPDK) təşkilatçılığı ilə "Bakı – İslam mədəniyyətinin paytaxtı -2009" ili çərçivəsində "İslam dünyasında qadın: ənənəvi dəyərlər və müasirlik" mövzusunda beynəlxalq konfrans keçirilib. APA-nın məlumatına görə, konfransda ilk öncə Heydər Əliyev Fondunun prezidenti Mehriban Əliyevanın konfrans iştirakçılarına müraciəti səsləndirilib.

Dini Qurumlarla İş üzrə Dövlət Komitəsi (DQİDK) Lənkəranda "Azərbaycanda dövlət və din münasibətlərinin hüquqi bazası" mövzusunda seminar-müşavirə keçirib. APA-nın cənub bürosunun məlumatına görə, rayondakı dini icmaların və hüquq-mühafizə orqanlarının nümayəndələrinin, habelə təhsil, mədəniyyət və tibb işçilərinin qatıldığı tədbirdə DQİDK-nin şöbə müdiri Ceyhun Məmmədov, Lənkəran rayon prokurorunun köməkçisi Rəşad Tanrıverdiyev, Qafqaz Müsəlmanları İdarəsinin (QMİ) cənub bölgəsi üzrə səlahiyyətli nümayəndəsi Qəni Axundzadə, DQİDK-nin cənub bölgəsi üzrə nümayəndəsi Miryəhya Bədirov və başqaları çıxış edərək Azərbaycanda dini ayinlərin və mərasimlərin icrası üçün heç bir maneənin olmadığını, məscidlərdə, kilsə və məbədlərdə əsaslı təmir və bərpa işlərinin aparıldığını, respublikanın demək olar ki, bütün şəhər, qəsəbə və kəndlərində yeni məscidlərin tikilib möminlərin istifadəsinə verildiyini diqqətə çatdırıblar.

"Mən dindar deyiləm, ona görə də Azərbaycandakı dini həyatı qiymətləndirə bilmərəm. Amma bir səfir kimi buradakı vəziyyət barədə məlumatlıyam - xüsusən də pravoslav kilsəsinin problemləri və qayğıları barədə. Çünki mənim təmsil etdiyim ölkənin əsas dini etiqadı pravoslavlıqdır". Bu sözləri Rusiyanın Azərbaycandakı səfiri Vladimir Doroxin Azərbaycanda pravoslavların vəziyyəti barədə APA-nın sualını cavablandırarkən deyib. O, əlindəki informasiyalara əsasən Azərbaycanda dindar insanlar üçün hər cür şərait yaradıldığını söyləyib: "Bir səfir kimi hansısa təzyiqlər və problemlərlə bağlı mənə müraciətlər olmayıb. Bu, onu göstərir ki, Azərbaycanda sülh, əməkdaşlıq şəraiti var və buna yalnız sevinmək olar. Bizdə din dövlətdən ayrıdır, amma çox maraqlıdır ki, burada kilsənin fəaliyyəti dövlətlərarası münasibətlərin lazımi istiqamətdə inkişafına yardım edir".

Bakı və Xəzəryanı Yeparxiyanın bərpasının 10 illiyi ilə bağlı "Bakı və Xəzəryanı Yeparxiya – 10 illik yol" adlı fotosərgi açılıb. APA-nın məlumatına görə, yepiskop Aleksandr Ata yeparxiyanın tarixi barədə danışaraq bildirib ki, 20-ci əsrin əvvəllərində yeparxiyanın yaradılmasına səbəb Azərbaycanda rusiyalı hərbçilərin, alimlərin, müəllimlərin, neft buruqlarında çalışan rusiyalı fəhlələrin sayının artması olub. O, XX əsrin birinci onilliyində Bakıda 17, Azərbaycanda isə 70-dən artıq pravoslav kilsəsinin fəaliyyət göstərdiyini xatırladıb. Azərbaycanda heç vaxt dinlərarası münaqişənin olmadığını, əksinə, pravoslav kilsələrin inşası zamanı müsəlmanlardan ianələr daxil olduğunu söyləyən yepiskop əlavə edib ki, Müqəddəs Jen-Mironosets kafedral kilsəsini məşhur mesenat Hacı Zeynalabdin Tağıyev tikdirib, sonra isə sahibkar Aydın Qurbanov bu kilsənin bərpasına maddi vəsait ayırıb.

Bakı və Xəzəryanı Yeparxiyanın bərpa olunmasının 10 illiyi münasibətilə yepiskop Aleksandr Ata mətbuat konfransı keçirib. APA-nın məlumatına görə, yepiskop 1905-ci ildə yaradılmış Yeparxiyanın tarixi barədə məlumat verib.

Moskva və Bütün Rusiyanın patriarxı İkinci Kirill 2010-cu ilin yazında Bakıya gələcək. APA-nın məlumatına görə, bu barədə Bakı və Xəzəryanı Yeparxiyanın yepiskopu Aleksandr Ata bu gün keçirdiyi mətbuat konfransında bildirib. O bildirib ki, Patriarx Bakıda keçiriləcək dinlərarası sammitdə iştirak etmək üçün dəvəti qəbul edib.

Qafqaz Müsəlmanları İdarəsi (QMİ) Həcc ziyarətinə getmək istəyən zəvvarlara özəl şirkətlərin xidmətlərindən istifadə etməməyə çağırır. Buna səbəb isə belə qurumların xətti ilə alınan vizaların qəbul olunmayacağıdır.

Qafqaz Müsəlmanları İdarəsinin (QMİ) sədri, Şeyxülislam Allahşükür Paşazadənin Tacikistana səfərinin yekunları ilə bağlı mətbuat konfransı keçirilib. APA-nın məlumatına görə, QMİ sədrinin müavini Hacı Sabir Həsənli bildirib ki, səfərin məqsədi "Əbu Hənifənin irsi və onun sivilizasiyalararası dialoqda rolu" mövzusunda keçirilən beynəlxalq simpoziumda iştirak etmək olub. Onun sözlərinə görə, Əbu–Hənifənin 1310 illiyinə həsr olunan simpoziumda 40-dan artıq dövlətdən 500-ə qədər nümayəndə iştirak edib. "Koxi Barbod" sarayında keçirilən simpoziumda Tacikistan prezidenti Emoməli Rəhmon, Allahşükür Paşazadə məruzə ilə çıxış ediblər. Hacı Sabir Həsənli bildirib ki, səfər zamanı A. Paşazadə Tacikistan prezidenti ilə birgə Mərkəzi Asiyada ən böyük məscid kompleksinin təməlqoyma mərasimində iştirak edib. Həmçinin E. Rəhmonla keçirilən görüşdə QMİ sədri Azərbaycanla Tacikistan arasında mənəvi əlaqələrin səviyyəsindən razı olduğunu bildirib. Bu görüşdə Hacı Sabir Həsənli və Azərbaycanın Tacikistandakı səfiri Məhərrəm Əliyev də iştirak edib. Səfər zamanı Allahşükür Paşazadə Azərbaycanın bu ölkədəki səfirliyində olub, Tacikistanda yaşayan Azərbaycanlılarla görüşüb.