Son zamanlar sosial şəbəkələrdə, müxtəlif saytlarda yeni-yeni “peyğəmbərlər” peyda olur. Özünə rəsul, elçi, övliya, imam deyənlər də az deyil. Bunların hamısının qaynağı isə, öz iddialarına görə, vəhydir. Amma maraqlıdır ki, bu vəhy kimdən gəlir? Bu barədə bir az sonra.

Əvvəlcə bu cür “peyğəmbərlərin” bir neçəsi haqqında maraqlı faktlar barədə yazmaq istərdik. Yəqin, bir çoxlarınız Ələsgər “peyğəmbər” barəsində eşidib. Eşitməyənlər də bu yazıdan sonra məlumatlı olacaqlar. Özünü “peyğəmbər” elan edən bu adamın ətrafında olanların elə hamısı ucdantutma “rəsullardır”. Yəni kim bunlara qoşulsa avtomatik “peyğəmbərlik” titulu qazanmış olur. Bu yaxınlarda bu “peyğəmbərlərdən” biri anasının dəfn mərasimini videoya çəkib sosial şəbəkələrdə paylaşıb. Onu böyüdüb boya-başa çatdırmış bir insanı hörmətsiz şəkildə salofana bükərək yerlə sürüyür və basdırır. Hələ dəfn mərasimində olanlarından bir o birinə “Tural əleyhisalam, o beli ver Vüsal əleyhisalama” deyir. İndi bu “əleyhisalamlardan” nə qədərdir - deyə bilmərəm. Amma başqa bir “peyğəmbərin” sübutları barəsində yazmaq istəyirəm. Gülünc də olsa, bu faktın özü acnacaqlıdır. Peyğəmbərlik iddiasında olanlardan biri qəribə bir sübut gətirib. Deyib ki, bəs mənim rəsul olduğumu firon da qəbul edib. Fironun kim olması barəsində suala gəlincə isə “peyğəmbərin” cavabı lap əttökən olub. Deyib ki, bəs mənim anamın adı Firuzədir, o və bir qardaşım mənə iman gətirib. Anamın adından “Fir”, qardaşım da 1-cu olduğu üçün “on” götürürük, oldu “firon.”

Bəli, bunlar nə dərəcə inandırıcı görünməsə də, həqiqətdir. Çox təəssüf olsun ki, bu cür həqiqətlərin sayı az deyil. Ən maraqlısı isə bəzi insanların həqiqətən də belə “peyğəmbərlərə” “iman gətirməsidir”.

Yazının əvvəlində bu “peyğəmbərlərə” gələn “vəhyin” sahibindən danışdıq. Əlbəttə ki, belələri ya ruhi xəstədir, ya da ki, şeytanın elçiləri. İnsanları yolundan azdıracağına and içən iblisin bu metodu zəiflər üzərində təsirli olur. Bunun təsirinin aradan aparılması üçün isə yeganə yol dini maarifləndirmədir. Nə qədər ki, yas məclislərində ərəbcə fatihə ilə kifayətlənib dini maarifləndirmə aparılmayacaqsa, axund və mollalar ancaq məclislərdə yasin oxuyub, məscidlərdə mənbəri boş qoyacaqlarsa və ya ən yaxşı halda gülməli hədislərlə insanları dindən uzaqlaşdıracaqlarsa, belə “peyğəmbərlərin” sayı da artacaq.

P.S. Axırzamanda bu cür halların baş verməsi təbiidir. Amma unutmaq lazım deyil ki, bir ömr savab bir anın içində yanaraq kül olur və onun atəşi insanı cəhənnəmdə gözləyir.