Bir-birinin ardınca müsəlman ölkələrinin qan çanağına dönməsi, əlbəttə, hər kəs kimi mənim də qəlbimi ağrıdır. Qanı tökülən günahsız insanları gördükcə bir şeyi düşünürəm: görəsən bunlar nə qədər davam edəcək? Əslində cavabı var və var olduğu kimi yoxdur da.

Misirdə “inqilab” oldu. Mübarəkin “başını yedilər” üstündən də bir stəkan sərin “koka-kola” içdilər. Ardınca da Liviyaya girişdilər. Amma orada 1-ci şəxs yapışdığı kürsüdən qopmaq niyyətində olmadığını açıqladı. Nəticədə onun özünü kanalizasiyada öldürdülər. Bu gün də Liviyada nə dövlət var, nə də demokratiya. Əksinə, müxtəlif terrorçu qruplar meydanda at oynadır və bundan istifadə edənlər ölkənin təbii sərvətlərini talayırlar.  Amma nə olsun, ölən ki, müsəlmandır. Mən “demokratik” qüvvələrin əsl üzünü “Mavi Mərmərə” əhvalatından sonra çılpaqlığı ilə gördüm. Daha açıq şəkildə dedilər ki, müsəlmanın qanı halaldır.  Nə qədər istəyirsiz öldürün. NO PROBLEM!

Odur ki, indi Bəhreyndə tökülən qanlara səssiz qalanda - təəccüblənmədim. Onsuz da yenə tökülən qan müsəlman qanıdır. NO PROBLEM! Amma İraq və Əfqanıstandan sonra qərb ideoloqları səhvlərini anlayıblar. Elə ki, Buş İraqda və Əfqanıstanda tökülən qanlara görə qınandı, indi digərləri bundan ibrət götürüblər. Odur ki, hazırda İŞİD adında bir “müsəlman” qiyafəli dəstəni ortaya atıblar. Suriyada, İraqda qırğınlar törədir. İndi kimi qınasınlar axı? Öldürən “müsəlman”, ölən müsəlman. Onlarlıq bir iş yoxdur. NO PROBLEM! Hələ üstəlik hay-küy qoparıb bir az da demokratiya, insan haqları dedilər – vəssalam! Məsələ öz həllini tapır. İndi BMT-nin nəyinə lazımdır ki, müsəlmanlar bir-birini qırır. Qoy qırsınlar! Eybi yox! Nə qədər sayları azalsa o qədər yaxşıdır. Düzü, bundan sonra hansı proseslərin baş verəcəyini proqnozlaşdırmaq istəmirəm. Əli qana batmış olanlar yəqin ki, cəzalarını alacaqlar. Bu dünyada olmasa da - Qiyamətdə.

P.S. Birdən Antarktidada bir qərblinin burnu qanasa bütün beynəlxalq, “demokratik”, bürokratik təşkilatlar yığışıb hay-küy salacaqlar ki, “ay haray, qoymayın, insan haqları pozuldu!”. Amma minlərlə müsəlmanın öldürülməsi - NO PROBLEM!

P.P.S. Unutmayın, müsəlmanlar da sahibsiz deyil. Bir gün bütün bunların hesabını soracaq insan - Zamanın Sahibi olan imam Mehdi (ə) gələcək. O zaman etdiklərinizə görə cavab verməli olacaqsınız. Bax, həmin vaxt sizin cəzalanmağınıza dair fitva veriləndə indiyə qədər öldürdüyünüz uşaqlar, qadınlar və qocalar bir ağızdan bu sözü deyəcəklər: “NO PROBLEM!”