Övladlarımızı, ailəmizi, var dövlətimizi İmamın yolunda qurban verə bilərikmi?

Rəhmətlik Baba Pünhanın bu misralarını hər dəfə yada salanda qorxuya düşürəm. Görəsən birdən İmam (ə.f.) zühur etsə nə edərəm? Əslində nə etməli olduğunu bilməmiş də deyiləm. Amma boynumda olan haqqı layiqincə icra edə bilərəmmi? Bax budur məni düşündürən.

Bəziləri İmamın zühurunu asan bir məsələ hesab edir. “İmam gələcək, dünyanı xilas edəcək.” Əgər bu məsələ cümlə qədər asan olsaydı Allah 1400 il bu zühuru uzatmazdı məncə. Bəklə biz İmamın zühuruna hazır deyilik? Bəlkə hələ də öz nəfsimizin istəkləri bizi bu zühurdan bir qədər də uzaqlaşdırır?

Ev, maşın, var-dövlət, övlad, ailə... Bunlar bizim bu dünyada qazancımızdır. Əlbəttə, insan fitrətində əlində olanı itirmək qorxusu var və bir anda qazandıqlarını itirmək istəmir. Allah bu fitrəti insanda qoyub. Amma nə yazıq ki, bəzən biz bu fitrəti düzgün istiqamətdə istifadə etmirik. Məsələn, qazandığımız 100 manatı itirməmək üçün onu ovcumuzun içində günlərlə saxlaya bilərik. Amma etdiyimiz bir savab əməli bəzən bir saat belə ovcumuzda saxlaya bilmirik. Elə bir dostumuza “mən filankəsə bu yaxşılığı etdim” deyərək qürrələnmək həmin əməlin savabını aradan aparır. Nədənsə burada itirməkdən qorxmuruq. Çünki maddiata daha çox bağlıyıq və dünya həyatı bizi bəzən axirətdən uzaqlaşdırır.

İmam zühur etsə... bu dünyada qazandıqlarımızı bir anda kənara qoyub, yaxud sərf edib o dəqiqə İmama qoşularıqmı? Əlimizdə olanın haram olduğunu söyləsə o andaca vaz keçərikmi? Övladlarımızı, ailəmizi, var dövlətimizi İmamın yolunda qurban verə bilərikmi?

Bax suallar ətrafında düşünməyə dəyər. Çünki hər cümə gələndə İmamın zühuu bir addım da yaxınlaşır. Bu suallara özümüzdə cavab tapa bilməsək “Allahum mə kulli vəliyyəkəl...” oxumağın heç bir mənası yoxdur.

P.S. Bu gün isə Hz Mehdinin (ə.s.) mövlud günüdür. Bu gün münasibəti ilə bütün Əhli-beyt aşiqlərini təbrik edirəm. Allahın yolunda sabit olmaq diləyi ilə...

Məhəmməd Əlizadə