“Böyük dayaq” filmini yada salanda bir epizodu xatırlayıram. Rüstəm kişi əleyhinə yuxarıya yazılan imzasız məktubları görəndə hirslənir və belə bir cümlə işlədir: “Ay namərd, yazırsan yaz, amma altına qol qoy!”

Bu sözləri elə-belə xatırlamadım. Bu gün bir sıra özünü mətbuat adlandıran, amma əslində mətbuatın üz qarası olan “saytcıqlarda”  dəyər verdiyim bir insana əməlli başlı qara yaxıblar. Amma bu qaranı elə yaxıblar ki, öz üz-gözlərinə də bulaşdırıblar. Belə ki, artıq 3 aydır ora-bura “danos” yazan “Ejder Eliyev” saxta adlı birisi əli hər yerdən üzüləndən sonra təzə bir “danos” hazırlayıb. İndi də İKT Gənclər Forumu Avrasiya Regional Mərkəzinin direktoru Elçin Əsgərova “növbə çatıb.” Bu adını bilmədiyimiz adamcığaz iddia edir ki, bəs Elçin Əsgərov Azərbaycanda “Hizbullah”ın rəhbəridir. Həm də deyir ki. bəs rəhbəri olduğu təşkilatı da vəhhabilər maaliyyələşdirir. “Hizbullah” və vəhhabi?! Elə siftəsindən bu iddianın nə qədər gülünc olduğunun şahidiyik. Məqsədim burada Elçin Əsgərovu müdafiə eləmək deyil və buna heç ehtiyacı da yoxdur. Çünki bu çamur elədir ki, yapşmaz, sadəcə olaraq ovulub tökülər.

Əsas məqsədim bu işlərlə məşğul olanlarla və yaxud olanladır. Bu adama lap yazığım gəlir. Çünki bu adam sadəcə olaraq “batan gəminin qaçan siçovulundan” başqa bir şey deyil. Onsuz da sonunun çatdığını anlayıb bacardıqca özünü ora-bura vurur.

Amma bu cür işlər sonda bumeranq effekti yaradır və həmin adamın özünə doğru qayıdır. Xatırlayırsınızsa, "Böyük dayaq" filmində bu “danosları” yazdıran Salman (burda söhbət saytlara diqtə edən intriqant məmurlardan gedir), yazan isə Yarməmməd idi. Yəni, hər ikisi kifayət qədər palçığın içinə batmış adamlardı. Sonda nə oldu? Onlar fiziki cəhətdən Rüstəm kişiyə qarşı çıxsalar da, mənəvi cəhətdən məğlub oldular.

İndi də dövrümüzün salmanları köstəbək yarməmmədlər vasitəsi ilə bu cür imzasız “danoslar” yazmaqla məşğuldurlar. Amma bu “Ejder Eliyev” də, onun “salmanının” da kim olduğu bəllidir. Sadəcə olaraq, bu məğlub olmuş köstəbəklərin özlərinin özlərini ifşa etməsi gərəkdir. Necə ki, bunu edirlər.

P.S. Bir misal da var. “Ələkçinin qıl verəni”. Bax, bu çox mühüm “vəzifədir.”  Bu cür “danosları” dərc edən “saytcıqlar” da elə həmin Salmanın əlaltılarıdır. Onlar da elə Salman və Yarməmməd kimi sonda məhvə məhkum olduqlarını anlayırlar. Amma batan gəmidə siçovulların (oxu: vəhabilərin) qaçışması təbiidir... Sonu dənizdir...