İslam Azərbaycanda (İslam.Az)

İmam Sadiqdən (ə) nəql olunan bir hədisdə buyurulur:

“Hər kəs Allah rizasına öz müsəlman qardaşının ehtiyacını ödəmək üçün çalışarsa, Allah-Taala ona min-min xeyir əməlin savabını yazar”.

(Kafi, c. 2, s. 197, 6-cı hədis)

Həzrət Əlidən (ə) nəql olunan bir hədisdə buyurulur:

“Allah-Taala yanında, əməllərin ən sevimlisi dua, ibadətlərin ən yaxşısı isə iffətdir”.
(Biharul-Ənvar, c. 93, s. 295)

Allahın Peyğəmbərindən (s) nəql olunan bir hədisdə buyurulur:

“Heç bir müsəlmanı alçaldıb təhqir etmə! Çünki onların ən kiçiyi də Allah yanında böyükdür”.

(Tənbihul-Xəvatir, c. 1, s.31)

Fars əsilli bir müsəlman İmam Əliyə (ə) şərbət verir. O Həzrət (ə) ondan bunun səbəbini soruşduqda bildirir ki, “Bizdə bu gün Novruz bayramıdır”. Həzrət Əli (ə) “Bu gündə daha nələr edirsiniz?” deyə soruşur. O Novruz adət-ənənələrinə xas olan küsülülərin barışması, evlərin təmizlənməsi, böyüklərin və yaxın qohumların ziyarət edilməsi kimi əməlləri sayandan sonra Həzrət Əli (ə) buyurur ki, “Hər gününüzü Novruz edin” və şərbəti alıb içir.

(Mən La Yəhzuruhul-Fəqih, c. 3, s. 300)

Məhəmməd Peyğəmbərdən (s) Həzrət Fatimə (sə.) haqqında nəql olunan bir hədisdə buyurulur:

“Həqiqətən, Fatimə mənim ciyərparəmdir, kim onu qəzəbləndirsə, məni qəzəbləndirmişdir.”

(“Səhih Buxari”, c. 5, s. 105, 255-ci hədis)

Məhəmməd Peyğəmbərdən (s) Həzrət Fatimə (sə) haqqında nəql olunan bir hədisdə buyurulur:

“Mənim qızım Fatimə dünyanın əvvəlindən axırına qədər bütün qadınların seyyidəsidir. O mənim canımın bir parçasıdır, gözümün nurudur, qəlbimin meyvəsidir, bədənimdə olan ruhumdur, .... O insan simasında olan mələkdir.”

(Biharul-Ənvar c. 43, s. 73)

Məhəmməd Peyğəmbərdən (s) nəql olunan bir hədisdə buyurulur:

“Öz qardaşına kömək etmək və xeyir vermək üçün çalışan şəxsə Allah yolunda cihad edənlərin savabı yazılacaq”.

(Ğurərul-Hikəm, 8610-cı hədis)

Allahın Peyğəmbərindən (s) nəql olunan bir hədisdə buyurulur:

“Ləyaqətli övlad Allah tərəfindən bəndələri arasında bölünmüş xoş ətirli gül çələngidir”.

(Məkarimul-Əxlaq, c. 1, s.471, 1610-cı hədis)

İmam Cəfər Sadiqdən (ə) rəvayət edilən bir hədisə görə İblis deyib:

"Yalnız beş cür insana mənim hiyləm təsir etməz, qalan insanlar mənim ovcumun içindədirlər. Həmin beş adam bunlardır: xalis niyyətlə Allaha sığınan və bütün işlərində Allaha təvəkkül edən şəxs; gecə və gündüz çoxlu təsbih (dua və zikr) edən adam; özü istədiyini öz mömin qardaşı üçün də istəyən adam; başına müsibət gələndə sızıldamayan şəxs və Allahın verdiyi ruziyə qane olan, Allaha ağ olmayan adam"

(Əl-Xisal, c. 1, s. 285)

İmam Əli(ə) əziz oğlu Həsənə (ə) tövsiyələrində birində buyurur:

“Oğlum! Axmaqla dostluq etməkdən çəkin. Çünki o sənə xeyir vermək istəyər, amma ziyan vurar.”

(Biharul-Ənvar, c. 74, s. 198, 35-ci hədis)