İslam Azərbaycanda (İslam.Az)

Prezident İlham Əliyev Müqəddəs Pasxa bayramı münasibətilə ölkənin pravoslav xristian icmasını təbrik edib.

"Ənənəvi olaraq, QMİ ilə İraqın müvafiq dövlət qurumları arasında saziş əsasında zəvvar səfərləri təşkil edilsə də, səfərlərin bərpası üçün rəhbərlik etdiyim qurumla anlaşma protokolunun imzalanması zəruridir", - çərşənbə günü Azərbaycanda səfərdə olan İraqın turizm və tarixi abidələr naziri Kahtan Abbas Noman Əl-Cuburi Alavadi ilə görüşən QMİ sədri Şeyxülislam Allahşükür Paşazadə bildirib.

Ağır Cinayətlərə Dair İşlər üzrə Hərbi Məhkəmədə dini radikal qrupda birləşərək hərbi mübarizəyə başlamağa cəhddə, ABŞ və Böyük Britaniya səfirliklərinə qarşı terrora cəhddə təqsirləndirilən sabiq zabit Kamran Əsədov və digər 19 nəfərin cinayət işi üzrə məhkəmə prosesi davam etdirilib.

"Bakı- İslam Mədəniyyəti Paytaxtı 2009" Mədəniyyət İli çərçivəsində aprelin 18-də Qobustanda "Qobustan pirləri" adlı tədbir keçiriləcək. Bu barədə Mədəniyyət və Turizm Nazirliyinin mətbuat xidmətindən məlumat verilib. Qonaqlar öncə Qara Atlı pirini ziyarət edəcəklər. Tədbirə yerli və xarici qonaqlar, mətbuat nümayəndələri dəvət olunub.

"Hələlik "Əbu Bəkr" məscidinin açılması ilə bağlı heç bir yenilik yoxdur, biz gözləyirik". Bunu Lent.az-a açıqlamasında "Nərimanov rayon dindarları" Dini İcmasının rəhbəri, "Əbu Bəkr" məscidinin imamı Qamət Süleymanov deyib.

Türkiyə Diyanət İşləri Başqanlığının Dini Məsələlər Komissiyası səs çıxardığı üçün dikdaban ayaqqabıların caiz olmadığını bildirib. Bu barədə məlumatı islam.az saytı Türkiyə mətbuatına istinadən verib.

Hindistanın Kanpur bölgəsində İslam Şurası hər bir müsəlmanın cib telefonundan istifadə edərkən şəriət qanunlarını pozmamaq üçün nələrə əməl etməli olduğunu maddələrlə göstərən qərar açıqlayıb.

Sabirabad rayonunda səfərdə olan ABŞ-ın Azərbaycandakı səfiri Ann Dersi rayonunda məşhur seyid ocağı olan Seyid Rəsul Ağa Ocağını ziyarət edib. Səfir Seyid Rəsul Ağanın qəbir-məqbərəsini gəzib, onun şəxsiyyəti ilə maraqlanıb. Diplomat Seyid Rəsul Ağanın yaxın qohumları ilə söhbət edib.

Bütün Qafqazın şeyxi Allahşükür Paşazadə bildirib ki, Azərbaycan müsəlmanları Türkiyə-Ermənistan sərhədlərinin açılması və iki ölkə arasında diplomatik əlaqələrin bərpa olunacağı barədə söz-söhbətlərin geniş vüsət almasından hədsiz narahatdır.

Yasamal rayon Dini İcmasının rəhbəri Mir Valeh Mövsümov çərşənbə günü Trend News-a bildirib ki, rayon İcra Hakimiyyətinin başçısı və bir neçə əməkdaşı məscidə gələrək, hasarları, məscidin qapılarındakı "Quran" kitabını və məscidin adı yazılmış lövhəni söküb.

Trend News-un arayışı: Yasamal rayon məhkəməsi ötən il noyabrın 28-də Yasamal rayon İcra Hakimiyyətinin iddiası əsasında, Murtuza Muxtarov küçəsi, 190 ünvanında yerləşən Məhəmməd Peyğəmbər məscidinin sökülməsi barədə qətnamə çıxarıb. Məhkəmə qətnaməsi onunla əsaslandırılıb ki, qeyd edilən ünvanda "təyinatı məlum olmayan qeyri-yaşayış sahəsi" tikilib.

Məscid nümayəndələri Bakının Yasamal rayon məhkəməsinin qətnaməsindən Bakı Apellyasiya Məhkəməsinə şikayət veriblər. Şikayətdə qətnamənin tamamilə əsassız və qanunsuz olması səbəbindən ləğv edilməsi, iddianın rədd edilməsinə dair yeni qətnamə çıxarılması xahiş olunur.

İcmanın nümayəndəsi, vəkil Muxtar Mustafayev isə Trend News-a bildirib ki, məkəmə qərarı qüvvəyə minmədən məscidin sökülməsinə başlanması qanunsuzdur. "Yasamal rayon məhkəməsinin məscidin sökülməsi ilə bağlı verdiyi qətnamədən apellyasiya şikayəti vermişik və şikayətimiz hələ ki, baxılma mərhələsindədir. Apellyasiya Məhkəməsi şikayətimizə baxmadan və qərar qəbul etmədən Yasamal rayon məhkəməsinin qətnaməsinin icrası qanunsuzdur. Həmçinin məkəmə qərarları məhkəmə icraçıları tərəfindən icra olunmalıdır, İcra Hakimiyyəti nümayəndələri tərəfindən deyil",-Mustafayev vurğulayıb.

Vəkil bildirib ki, Dini İcmanın rəhbəri Mövsümovun adından verilən qarşılıqlı iddiada məscidin layihəsinin Bakı şəhər İcra Hakimiyyəti və Yasamal rayon İcra Hakimiyyəti tərəfindən təsdiq edilməsindən imtinanın qanunsuz hesab olunması və layihənin təsdiq edilməsinin məcbur edilməsi tələb olunur. Mustafayevin sözlərinə görə, Yasamal rayon məhkəməsində qarşılıqlı iddia ərisəsinin verilməsinə imkan verilmədiyindən, onlar bu iddianı Bakı Apellyasiya Məhkəməsində qaldırmalı olublar.

Trend News-un arayışı: Bakı Apellyasiya Məhkəməsinin qarşılıqlı iddia ərizəsini icraata qəbul etməkdən imtina etməsi barədə qərardan Dini İcma Ali Məhkəməyə kassasiya şikayəti verib.

Qafqaz Müsəlmanları İdarəsi (QMİ) qanunsuz tikildiyi iddia olunan Məhəmməd Peyğəmbər məscidinin sökülməsi ilə razı deyil.

Məscidin nümayəndələri Avropa Şurasının Baş katibi Terri Devisə müraciət edərək, Peyğəmbər Məscidinin sökülməməsinə yardımçı olmasını xahiş ediblər. Devis onların məktubuna cavab olaraq bildirib ki, məscidin sökülməsi ilə bağlı mübahisənin ölkə qanunvericiliyi çərçivəsində həllinə tərəfdardır və bu məsələ onun təmsil etdiyi qurumun səlahiyyətində deyil.