“Yasin” oxutdurmaq, Quran tapşırmaq kimi əməllərlə tez-tez qarşılaşırıq. Kimlərsə bunu mollalar üçün gəlir mənbəyi, kimlərsə Allah qarşısında savab, bir çoxları isə mənasını belə bilmədən boş və əhəmiyyətsiz hesab edir.

Əvvəldə bu əməlin mahiyyəti barədə. “Yasin” oxutdurmaq, Quran tapşırmaq həqiqətən bəyənilən bir əməldir. Allah kəlamını oxumağın böyük savabı var. Qurani-Kərimin hər hansı surəsini və ya bütünlüklə oxumaq o kitabı nazil edənin qarşında Onun dediklərini təsdiq etmək mənasının verir. Əlbəttə ki, Allahın buyurduqlarını oxumaq (əməl eləmək şərti ilə) Allah tərəfindən dəyərləndirilən bir işdir. Naqis bir misal da olsa, bu bir növ hansısa yazıçının kitabını oxumaq və onunla söhbət əsnasında bu kitabdan sitatlar gətirən zaman sənə qarşı hörmətinin artmasına bənzəyir. O ki, qaldı “Yasin” oxumağa, bu surə Quranın ən bəyənilən surələrindən ki, hətta bənzətmə kimi “Quranın gəlini” adını alıb. 
İndi də Quran tapşırmanın mahiyyəti barədə. Quranı oxuyan adam bunun müqabilində Allah tərəfindən verilən savabı vəfat edən şəxsə hədiyyə edir. Vəfat edən insan onsuz da daha özü savab qazanmaq iqtidarında deyil. Amma dünyada etdiyi yaxşılıqların müqabilində vəfat edəndən sonra da övladları və ya dostları onun üçün Quran oxumaq və ya oxutdurmaqla yenə də savab sahibi olur. 
Bəs Quranı oxutdurmaq müqabilində pul vermək olarmı? Əslində, hər bir müsəlman Allahın kitabını oxumağı bacarmalıdır. O cümlədən öz vəfat etmiş yaxının yuyub, qüsl verib, kəfənləyib dəfn etməyi, ona Quran oxuyub tapşırmağı da. İndi biri bunu eləməyi bacarmır və ya eləmək istəmir. Əvəzində bu işi görmək üçün adam, yəni mollanı, axundu əcr (icarə) tutur. Yenə də naqis misal olsa da, bu bir növ evdə təmir eləmək üçün usta çağırmağa bənzəyir. Ustanı da çağıranda ona zəhmətinin haqqını verdiyimiz kimi, bizim əvəzimizdən vəfat etmiş yaxınlarımızı dəfn edən, hələ üstəlik onun üçün vaxtını və gözünün nurunu sərf edib Quran oxuyan insana niyə də zəhmət haqqı verilməsin?
Bəziləri “mollalar Quranı pulla oxuyurlar. Qurana da qiymət qoymaq olar?” kimi fikirlər səsləndirirlər. Bu sualın cavabı sadədir. Heç kim səni Quranı mollaya oxutdurmağa məcbur etmir. Zəhmət çəkib özün də oxuya bilərsən. Amma oxumaq istəmirsənsə, o zaman gördürdüyün iş müqabilində zəhmət haqqını da verməlisən. O ki, qaldı Quranın oxunmasına görə tələb olunan zəhmət haqqının məbləğinə, bax, bu da əsas məsələdir. Bunun üçün yenə də naqis misal çəkməyə məcburuq. Evdə hər hansı bir təmir işini görən ustalar bəzən fərqli qiymətə işinin müqabilində pul tələb edir. Yəni qısası, “mən bu işi bu qiymətə görürəm” deyir. Ya razılaşırıq, ya da başqa birisini çağırırıq. Əksər hallarda razılaşırıq. Amma nədənsə növbə Allah kəlamına gələndə əlimiz əsir. Doğrudur, Quran Allah kəlamı olduğu üçün həqiqət qiymətsizdir. Amma ona qiyməti elə biz özümüz verməliyik. Daha “Quranı niyə baha oxuyursan?” sualını vermək ən azından insafsızlıqdır.