İslam Azərbaycanda (İslam.Az)

Bakıdakı "LUKoil" yanacaqdoldurma məntəqəsinə silahlı basqın etməkdə, ABŞ və Böyük Britaniyanın Azərbaycandakı səfirliklərinə qarşı terror aktı hazırlamaqda və digər cinayətlərdə təqsirləndirilən radikal dini qrup üzvlərinin cinayət işi üzrə məhkəmə prosesi davam edir.

Ali Məhkəmədə "Yəhovanın şahidləri" dini icmasının kassasiya şikayətinə baxılıb. Məhkəmədən verilən məlumata görə, Mülki İşlər üzrə Məhkəmə Kollegiyasının hakimi Əsəd Mirzəliyevin sədrliyi ilə keçirilən məhkəmə iclasında dini icmanın Daxili İşlər Nazirliyinə, Xətai rayon Polis İdarəsinə və həmin idarəsinin 34-cü Polis Bölməsinə qarşı kassasiya şikayəti təmin edilib.

"Bakı İslam Mədəniyyətinin Paytaxtı–2009" çərçivəsində ölkədə kitabxana işi ilə bağlı irimiqyaslı tədbirlərin reallaşması nəzərdə tutulub. Mədəniyyət və Turizm Nazirliyindən verilən məlumata görə, aprelin 20-21-də Bakıda İslam Ölkələri Milli Kitabxana Direktorları Şurasının ikinci konfransı keçiriləcək.

"Biz Əbu Bəkr məscidinin açılması üçün qanun çərçivəsində sona qədər mübarizə aparacağıq. Bakı Apellyasiya Məhkəməsinin qərarını alan kimi Ali Məhkəməyə kassasiya şikayəti verəcəyik. Azərbaycan məhkəmələri məscidin açılmasına razılaşmasa, İnsan Hüquqları üzrə Avropa Məhkəməsinə müraciət edəcəyik. Biz heç vaxt qanunlara müxalif olmamışıq və bu məsələdə də eyni mövqe tutacağıq". Əbu Bəkr məscidinin imamı Hacı Qamət Süleyman "Media forum" saytına açıqlamasında belə deyib.

Bakının Binə qəsəbəsində yerləşən İmam Rza məscidinin nəzir qutusundan qıfılı sındırmaq yolu ilə nəzir pulları oğurlanıb.

"Bakının 2009-cu il üçün İslam mədəniyyətinin paytaxtı elan edilməsi böyük tarixi hadisə, Azərbaycan üçün şərəfdir". Bu sözləri bu gün Heydər Əliyev Sarayında "Bakı-İslam Mədəniyyətinin Paytaxtı-2009" Mədəniyyət İlinin təntənəli açılış mərasimində çıxış edən Azərbaycan prezidenti İlham Əliyev deyib.

Sumqayıtda yayılması qanunla qadağan edilən kitablar tapılıb. Daxili İşlər Nazirliyinin mətbuat xidmətindən verilən məlumata görə, şəhərin Kimyaçılar qəsəbə sakini Qorxmaz Ağabalayevin evindən yayılması qanunla qadağan edilmiş 13 ədəd kitab, 41 ədəd CD disk və 3 ədəd buklet aşkar edilərək götürülüb. Faktla bağlı araşdırmalar aparılır.

Bu gün Heydər Əliyev Sarayında "Bakı - İslam Mədəniyyətinin paytaxtı -2009" mədəniyyət ilinin təntənəli açılış mərasimi keçirilib. Tədbirdə Azərbaycan prezidenti İlham Əliyev, Heydər Əliyev Fondunun prezidenti, İSESKO və UNESCO-nun xoşməramlı səfiri Mehriban Əliyeva, İSESKO-nun baş direktoru Əbdüləziz bin Osman əl-Tüveyciri, Avropa və İslam dövlətlərinin mədəniyyət nazirləri, şəhər merləri iştirak ediblər.

Bakı Apellyasiya Məhkəməsi "Əbu Bəkr" məscidinin fəaliyyətinə icazə verilməsi barədə iddianı təmin etməyib. Bu barədə APA-ya "Nərimanov rayon dindarları" Dini İcmasının vəkili Cavanşir Süleymanov məlumat verib.

Bu il ərzində dünyanın beş ölkəsində Azərbaycan mədəniyyət günləri keçiriləcək. Bunu mədəniyyət və turizm naziri Əbülfəs Qarayev bildirib. Onun sözlərinə görə, artıq beş ölkədə keçiriləcək mədəniyyət günləri ilə bağlı tədbirlər planı hazırlanır.