Şair qeyzə gəldi. Kişi donuz ətindən hazırlanmış kolbasa yemək istəyən məqamda iştahasını pozublar, halal kolbasa təklif ediblər. Şair də od püskürdü! Status guppuldatdı şair!..  Biz isə şairə (şəstlə “şair” də yazırıq... Füzulinin ruhu bizi lənətləməsə yaxşıdır... ) 1-2 kəlmə deməzdən öncə bəzi məsələlərə aydınlıq gətirək.

Dindarları çox vaxt aqressivlikdə ittiham edirlər. Amma son dövrdə Azərbaycan cəmiyyətində ən aqressiv təbəqəyə deistlər və ateistlər çevriliblər. Hətta demək olar ki, ateizm yeni, radikal və dözümsüz bir dinə çevrilib. Bu yeni dinin əsas hədəfi də dindarlardır. Repertuarları da çox genişdir, təhqirdən tutmuş müxtəlif aşağımalara qədər, özlərini dağın başına qaldırmaqdan dini rişxəndə, dindarları geri zəkalı hesab etməyə qədər. Az qalırlar desinlər ki, dindarın öz dini inancını yaşamağa haqqı yoxdur ya da ki, gedib tövlədə yaşamalıdır.

Ay şair! Əvvəla, gəl görək hələ sən özün kimsən? Bu dünyada, ən azı şair kimi neyləmisən ki, dindara belə yuxarıdan aşağı baxırsan? De görək, sən Nizaminin, Füzulinin, Xəqaninin əsirlər öncə kəsilən ayaq dırnağı ola bilərsənmi? Halbuki, bu sadalananlar dindar idilər və elə o satıcının dediyini hələ əsirlər öncə deyirdilər.

İkincisi isə, cənablar, heyranlıq duyub özünüzü oxşatmaq istədiyiniz hüquqi və modern Qərbdə bu yanaşmanıza görə sizi məhkəməyə verib dərinizi soyardılar.

Üçüncüsü isə dindarın öz dinini və fikirlərini ən azı siz ateist və deistlərin ətrafa təlqin etdikləri qədər tanıtma və təbliğ etmə hüququ var. Demokratik bir ölkədir, kiməsə təklif irəli sürülə bilər. Və yenə də demokratik prinsiplərə uyğun olaraq, o kimsə təklifi rədd edə bilər.

P.S. Bu arada Yenicag.az yazır ki, şairlə “Favorit” mağazasında belə bir söhbət heç yerli dibli olmayıb. Şair arağından vurub yatarkən bunları yuxuda görüb və sonra durub yuxusunu statusa yazıbmış. Daha nə deyəsən? Ağıllı ol, şair!