Növbəti 8 Marta yetişdik. Bəri başdan deyək ki, sonra anlaşılmazlıq olmasın. Ay camaat:

1.Martın 8-i ilə 7-si və ya 9-u arasında heç bir fərq yoxdur.

2. Martın 8-i Azərbaycanın milli bayramı deyil.

3. Martın 8-i dini bayram deyil.

Belə. İndi keçək əsas məsələyə.

***

Hər bir işdə olduğu kimi, bu məsələdə də “orta yolu” təqib etmək daha məqsədəuyğundur. Nə təhrif, nə də ifrata getməliyik. "Qadınlar bayramı" anlayışı da pis şey deyil. Amma qadınları ildə bir dəfə deyil, dəfələrlə yada salaq. Dediyimiz kimi, həddi aşmamaq şərti ilə. Ümumiyyətlə, bu bayramın iki “qəhrəman” qrupu var: bu bayramları bayram olmaqdan, qadın hüquqlarını düşünmək kontekstindən çıxarıb onu istehlak bazarına çevirənlər və hər şeyə dini don geyindirib “olmaz” irəli sürənlər. Birinci qrup üzərində çox da dayanmayaq. Zatən, hər şeyi pulla ölçən kişilər, pullu ər axtarıb sonra da pullu kürəkən arayan qadınlar kifayət qədərdir və onların geniş təqdimata ehtiyacları yoxdur. 8 Mart da onlar üçün növbəti “bazardı”. İkinci qrupa isə bir qədər geniş diqqət yetirək.

***

Bu il yenə “olar-olmaz” məsələsi gündəmə gəldi. Yenə din “təəssübkeşləri”, “üləmalar” “şok açıqlamalarla” milləti əmr bi məruf etməyə çalışırlar: Klara Setkin belə gəldi, Roza Lüksemburq belə getdi, yəhudilərin Purim bayramı ordan çıxdı (yeri gəlmişkən: heç xəbəriniz var ki, yəhudilərin Purim bayramı da müsəlmanların əlamətdar günləri kimi miladi təqvimi ilə hər il ayrı-ayrı tarixlərdə qeyd olunur?) və s. və i.a. “Olmaz”, “bizə yaraşmır”, “haramdır”... Əlbəttə, bu dəfə də göz yumub keçmək olardı, həmişəki kimi. Onsuz da olan olacaq, gələn il də bu ildən fərqlənməyəcək çox guman. Amma hər halda... Bir neçə sual və bir neçə fikir.

***

8 mart gününə qarşı Səlib yürüşü edənlərə üzümü tutub soruşmaq istəyirəm. Qardaşlar, başınıza dönüm, nə vaxtsa anasına, həyat yoldaşına, bacısına, qızına bir dəstə gül uzadıb belə söyləyən eşitmişiniz: “Əzizim! Səni Klara Setkin tərəfindən təməli qoyulan, Roza Lüksemburqun xeyir-dua verdiyi, əslində yəhudilərin Purim bayramı olan, bizim milli-dini dəyərlərimizə zidd, Xanım Zəhranı (ə) unutmağımıza gətirib çıxara biləcək müəmmalı gün münasibəti ilə təbrik edirəm!”? Yəqin ki, eşitməmisiniz. Elə mən də. Dünyanı qoyaq bir kənara, Azərbaycandan danışaq. Sizcə orta statistik Azərbaycan qadınına bu “şok açıqlamalar” çoxmu maraqlıdır? Sizcə martın 8-i ona bir dəstə gül bağışlasaq nə baş verər? Dərhal çevrilib ateist və ya yəhudi olarmı? Sol çiynimizdəki mələk dərhal qeydlərinə başlayarmı? Ya Ərş titrəyər? Ya artıq martın 9-da bu əməlimizə görə sübh namazını qəzaya verəcəyik? Nə?

***

Daha bir maraqlı məqam. Əlində dəryaz ortalıqda dolaşaraq 8 martı qətl etmək istəyənlərin böyük əksəriyyəti kişilərdir. Sizə bir qardaş məsləhəti. Dəryazı qoyun bir kənara. Gedin 1-2 manat verin, bir dəstə nərgizgülü alın. Sonra aparın martın 8-də bağışlayın əzizinizə. Məsələn, həyat yoldaşınıza. Bu zaman söyləniləcək mətnin yüz, min, bəlkə də milyon variantı mövcuddur. Birini yazım, bəlkə lazım olar: “Təqvim bir bəhanədir. Bayram isə gərək insanın qəlbində olsun. Sən Allahın mənə bəxş etdiyi bir nemətsən, əbədi bayramımsan. Subhanallah! Çox sağ ol ki, varsan!”. İnandırıram: heç bir normal qadın bu sözlərdən sonra gül dəstəsini alıb nə başınıza vuracaq, nə də zibilxanaya atacaq. Vallah, vurmayacaq, atmayacaq! Əlbəttə, əgər indiyə qədər əzizinizə heç vaxt gül hədiyyə etməmisinizsə, ona bir əşya kimi baxmısınızsa, onun fikrini heç vaxt dəyərli saymamısınzsa, onunla qulluqçu və kəniziniz kimi davranmısınzsa, o zaman ehtiyatlı olun: 8 mart aksiyası onun bayılması ilə, hətta daha ciddi fəsadlarla nəticələnə bilər. Yox, əgər həyatınızda mütəmadi olaraq belə addımlar atmısınızsa, o zaman martın 8-i də olacaq sıradan bir gün: kişinin Qadına diqqəti və hörmətinin təzahür etdiyi bir gün. Dünən kimi. Bu gün kimi. Sabah kimi. Vəssalam. Bir manata görə özünüzü belə həlak etməyin. Qadınlar sadəcə diqqət tələb edir. Pul və hədiyyə isə ikinci dərəcəlidir.

P.S. Əzizlər! İslamı xortdan cildində camaata təqdim etməyimiz yetər. Hər şeydə, hər bir hadisədə 3-cü və ya 4-cü planda ehtimal etdiyimiz təhlükələrə görə camaatı bezdirməyək, “qırmızı” işarələr aramayaq, İslamdan iyrəndirməyək, tonqalı söndürüb külü ilə oynamayaq. İnanın, sizin yaratdığınız “külək dəyirmanlarını” sizdən başqa heç kim görmür, heç ağlına da gətirmir belə şeyləri. Baxın ətrafınıza. Minlərlə kişi martın 8-də əziz qadınlarına hədiyyə verir, gül dəstəsi bağışlayır. Noolsun? Bakıdakı sinaqoqun qapısında izdiham görürsünüz, ya yüzlərlə qadın “Nizami” metro stansiyası qarşısındakı məlum heykəlin qarşısında çadrasını və ya hicabını açıb? Siz Allah, İslamı qara çalarlara qərq etdiyiniz o əlinizdəki boyanı qoyun bir tərəfə, imkan verin insanlarımız bu dinin gözəlliyini duysun. Lütfən!

Vüsal Əliyev

islam.az