Demək olar ki, dünyanın bütün meqapolislərində bu problem yaşanır: yollarda nəqliyyat sıxlığından yaranan tıxaclar. Bu problem Bakımızdan da yan ötməyib. Onun aradan qaldırılması üçün müxtəlif təkliflər irəli sürülsə də, faydası olmayıb. Amma mən yeni, indiyə qədər analoqu olmayan bir variant fikirləşmişəm ki, paytaxtımızı tıxaclardan xilas edə bilər. Özü də bu variant ancaq Bakı üçün keçərlidir a, nəzərdən qaçırmayın. Nəyimizə lazımdır Paris, London, Berlin? Əsas özümüzük. Beləliklə, layihəni izah edirəm və əsas müddəalarını təqdim edirəm.

Əvvəla qeyd edim ki, mən bu layihəni qalın kitabları oxuduqdan sonra kəşf etməmişəm. Bu, saatlarla tıxaclarda yubananmaların məhsuludur.

Beləliklə, təklif edirəm ki, Kürdəmirlə Ucar arasında mövcud boş ərazilərdən 100-200 hektar xam torpaq ayrılsın. Daha sonra Bakının müxtəlif küçə və prospektlərində qazma və tikinti-bərpa işləri aparan texnika həmən əraziyə köçürülsün. Bütün rəhbər və fəhlə heyəti ilə birlikdə. Bax, bundan sonra qeyd olunan torpaqlarda intensiv iş başlasın. Həftənin tək günləri ərazi bütövlüklə asfaltla örtülsün, yol kənarlarına mərmər səkilər çəkilsin, imkan olan bütün daşlar mütləq “laqundalansın” (bu son dərəcə vacib şərtdir), cüt günlər isə bu asfalt və səkilər dağıdılsın. Bazar günü texnika və “yol sehirbazlarımız” dincəlsin. Amma iş dayanmasın a! Bazar günü əraziyə kommunikasiya xəttləri – kanalizasiya, telefon, elektrik – çəkənlər cəlb edilsinlər. Günün birinci yarısı bütün əraziyə müvafiq xəttlər çəkilsin, ikinci yarısında isə bu xəttlər sökülsün. Axı səhəri asfalt çəkənlər gəlməlidirlər. Bax, beləcə də davam etsin. Fasiləsiz. Aylarla, illərlə. Təbii ki, belə böyük və ciddi layihəyə ciddi rəhbər də lazımdır. Əcəba, kim ola? Heç şübhə etmirəm ki, hamı bir yerdə “Ha-cı-ba-la!” dedi! Yəqin ki, son dəfə belə həmrəyliyi kiçik yaşlarında Yeni il şənliyində Şaxta Babanı çağıranda nümayiş etdirmişdiniz. Tamamilə doğrudur! Ancaq və ancaq! O! Burda kim qalacaq? Heç kim! Tamamilə heç kim! Nə ehtiyac var ki? Zatən bütün işlər orda, Kürdəmirdə görüləcək. Onun burda nə işi qalacaq? HEÇ NƏ!

Bu layihəni həyata keçirməklə nə əldə ediləcək?

1. Bakı dərindən nəfəs alacaq. Çünki paytaxtımız sinəsinə çökmüş bu ağırlığında texnikaya tab gətirmir, boğulur, bunu hamımız görürük.

2. Yollarımızda tıxacların sayı əhəmiyyətli dərəcədə azalacaq. Çünki artıq eyni küçə və prospektlərə hər il asfalt çəkmək heç kimin marağında olmayacaq. “Xəstələr” isə mərəzlərini Kürdəmir çöllüyündə müalicə edəcəklər. Bakıda isə avtomobillər rahat hərəkət edəcək.

3. Bu layihənin perspektivləri çox genişdir. Gələcəkdə daha samballı qüvvələr cəlb etməklə sözügedən poliqonda göydələnlər, körpülər, şadlıq sarayları ucaltmaq, hətta metro xətti çəkmək olar. Təbii ki, əvvəlcədən müəyyən edilmiş – həftənin tək və cüt günlərinə uyğun iş bölgüsünə sadiq qalaraq.

4. Ən başlıcası isə, bütün dünya yenə də Azərbaycandan danışacaq. Çünki bu layihənin nəinki analoqu, hətta ataloqu, babaloqu, nənəloqu, praktoloqu, seksopotoloqu və ginekoloqu da olmayacaq.

Məndən, Bakını və Bakı sakinlərini tıxacdan qurtarmaq niyyətində olan sadə Bakı sakinindən bu qədər. Maraqlanan təşkilatları layihənin detalları ilə tanış etməyə hazıram.