Daha bir Ramazanı geridə qoymaq üzrəyik. Bu yazıda yaxşı hallardan danışmaq istəmirəm. Ona görə yox ki, qəlbim qaradır, yaxşıları görmürəm. Yox, ona görə ki, yaxşıları deyəndə qorxuram yenə bir il yuxuya gedək, gələn Ramazanda ayılaq. Problemlərdən danışmaq istəyirəm. Deyəcəklərim təzə söz olmasa da, düşünürəm ki, xatırlamağa dəyər. Çünki təkrarda hər zaman fayda var.

Bəzi problemlərimiz keçən illərdəki kimi yenə təkrar oldu, bəzi problemlər bu il peyda oldu.

Yenə keçən ilki kimi nə dövlət səviyyəsində, nə də rəsmi KİV müstəvisində demək olar ki, heç bir Ramazan əhval-ruhiyyəsi hiss etmədik.

Yenə başqa ölkələrin telekanallarında iftar vaxtı verilən azana həsrətlə baxdıq.

Yenə obaşdan vaxtı xarici telekanalları çevirib oradakı söhbətlərə qulaq asdıq.

Yenə dini təşkilatların, dini saytların təqdim etdiyi Ramazan cədvəlləri bir-birindən az qala yarım saat fərqləndi.

Yenə bəzi iftar süfrələrinin əsas qonaqları dost-tanışlar, imkanlı adamlar, hörmətli hacılar oldu.

Yenə Ramazanın başladığı gün mübahisələr qopdu. Biri iyunun 28-i oruca başladı, o biri 29-u, o biri də 30-u.

Yenə ilin 11 ayında günorta naharsız qalmağa asanlıqla səbr edən bəziləri Ramazan ayında mədələrinin xəstə olduğunu xatırladılar.

Yenə dolanışığı heç də pis olmayan bəziləri bayram qabağı bazarda 3 kilo buğdanın qiymətini öyrənməyə can atdılar ki, verdikləri fitrə zəkatı məbada, minimal həddən çox olmasın.

Yenə Ramazan boyunca şəhərin mərkəzində, camaatın gur olduğu küçələrdə yerləşən açıq hava altındakı kafelər var gücü ilə işlədi.

Yenə peşəkar dilənçilər xəbərsiz insanların fitrə zəkatını mənimsəmək üçün var güclərini səfərbər etməyə hazırlaşdılar.

Yenə bəziləri müqəddəs ayda belə, araq içməkdən özlərini saxlaya bilmədilər, iftar qabağı işdən çıxıb evə gələndə yolüstü araq almağı unutmadılar.

Yenə Ramazanı fələstinlilər işğal altında, suriyalılar qorxu və səfalət içində, qarabağlılar öz ev-eşiklərindən kənarda yaşadılar...

Amma təzə problemlərin də şahidi olduq.

Bu ilki Ramazanda dünyanın hər an partlamağa hazır olan bəzi nöqtələrindəki silahlı qarşıdurmalar pik həddinə çatdı: Suriya, İraq, Fələstin...

Bu ilki Ramazanın “qaynar mövzusu” isə Qədr gecəsində Quranı baş üzərinə qoyub dua etməyin düzgün ya səhv olması oldu...

Hətta Qəzzədə baş verənlərə futbolçular da biganə qalmadılar. Dünya şöhrətli futbolçulardan biri öz qonorarından fələstinlilərə yardım etdi, o biri isə İsrailə...

...Daha bir Ramazanı arxada qoymaq üzrəyik. Həm köhnə, həm də təzə problemlərə baxmayaraq, gələcəyə ümidlə boylanmaq istərdim. İnşallah, gələn Ramazanda vəziyyət yaxşılığa doğru dəyişər, Ramazan bayramımız da əsil bayram olar...