Birləşmiş Millətlər Təşkilatının (BMT) Baş Assambleyası Fələstinə bu təşkilatda müşahidəçi dövlət statusu verilməsinə dair qətnamə qəbul etdi.
BMT-yə üzv olan 193 dövlətdən 138-i qətnamənin lehinə, 9-u əleyhinə səs verib, 41 dövlət “bitərəf” qalıb. Digər dövlətlər səs verməkdən imtina ediblər.

Əksəriyyət baş verən hadisəni fələstinlilərin, kiçik də olsa, qələbəsi kimi qələmə verməyə tələsdi. Amma doğurdanmı bu bir zəfərdir? BMT-nin sözügedən qətnaməsinin qəbulundan sonra dünyada, Yaxın Şərqdə, sadə fələstinlilərin həyatlarında nə kimi ciddi, qlobal dəyişikliklər baş verəcək? Bəlkə də kimsə bizi bədbinlikdə ittiham edəcək, amma ciddi dəyişikliklər gözləmək sadəlövhlük olardı. Bir qədər də irəli getsək, heç bir dəyişikliyin baş verməyəcəyini demək məcburiyyətində qalacağıq. Belə düşünməyimizin də əsas var.

Əvvəla, istər BMT, istərsə də hansısa beynəlxalq təşkilatların qərarları, qətnamələri ABŞ-ın maraqlarına zidd olacağı təqdirdə həyata keçirilmir. Ağ Ev isə sözügedən məsələdə mövqeyini gizlətməyə ehtiyac duymadı. Həqiqətən də, kimdən, nə üçün gizlətməlidir? Çox sayda kağız qaralamaq olar. Amma bu cızma-qaraların reallaşması birbaşa Birləşmiş Ştatların iradəsindən asılıdır. Belə nümunələr də kifayət qədərdir. İsrailə aid olan məsələləri yada salmaq kifayətdir. Sionist qurum ABŞ-ın Yaxın Şərq filialıdır. Odur ki, Ağ Evin hansısa təşkilatın, hətta BMT-nin olsa belə, qərarına görə xarici siyasətinin vektorlarını dəyişəcəyi ehtimalı “sıfır”a bərabərdir.

İkincisi, BMT-nin daha öncə qəbul etdiyi qətnamələrin elə kağız üzərində qalmasına dair də kifayət qədər nümunə göstərmək mümkündür. Uzağa getmək də lazım deyil, elə Qarabağ münaqişəsi üzrə 1993-cü ildə ardıcıl qəbul edilən 4 qətnaməni xatırlamaq kifayətdir. Artıq 20 ilə yaxın müddət keçsə də, ermənilər işğal etdikləri torpaqları nəinki tərk etməyiblər, heç bu haqda düşünmürlər də. İndi də israillilərin və onların amerikalı havadarlarının BMT-nin qətnaməsindən sonra dərhal tövbə edəcəklərini və bir daha günahsız fələstinliləri, uşaqları, qocaları qətlə yetirməyəcəklərini gözləməyinə dəyməz.

Sözügedən məsələ üzrə səsvermə başa çatdıqdan dərhal sonra ABŞ-ın BMT-dəki daimi nümayəndəsi Syuzan Rays bildirib ki, “qəbul edilən qətnamə sülhə aparan yolda yeni maneələr yaradacaq və ABŞ bunun əleyhinədir”. Raysın sözlərində məntiq aramaqla özünüzü yormayın. Məntiq sadəcə olaraq yoxdur, ola da bilməzdi. Çünki ABŞ-ın bütün siyasətinin təməlində Krılovun “Qurd və quzu” təmsilindəki prinsip dayanır: “Mənə yemək gərəkdir, bax günahın bu”. Vəssalam. Əgər ABŞ acdırsa – bitdi! Artıq heç bir qətnamələr, qərarlar, mənəviyyat qanunları yardım etməyəcək. Nişangaha alınan qurbangaha göndəriləcək. Əlbəttə ki, Yaxın Şərqdə bəzi ölkə və siyasi hərəkatların simasında istisnalar da var. Bu istisnalar artıq uzun illərdir ki, ABŞ və müttəfiqlərinin təzyiqlərinə məruz qalırlar. Hərçənd, İsrail ABŞ-a elə belə “anlaşılmazlıqlarla” mübarizə üçün gərəkdir. Yaxın gələcəkdə də Ağ Ev mövqeyindən geri çəkilmək niyyətində deyil. Odur ki, Yaxın Şərqdə gərginlik zərrə qədər də azalmayacaq. Hər şey elə əvvəlki kimi, İsrailin yarandığı gündən indiyə qədər davam edən tərzdə qalacaq.

P.S. Yəqin bu nadir hallardan biridir ki, müəllif səmimi qəlbdən proqnozlarında yanılmaq istərdi.