Yerli İnternet resurslarından biri ekspertlər arasında sorğu keçirib: Azərbaycanda fahişəxanaları leqallaşdırmaq lazımdırmı? Buna informasiya səbəbi kimi isə son zamanlar sosial şəbəkələrdə qızğın müzakirələrə səbəb olmuş ailə xəyanəti və zorlamalar göstərilib. İddia olunur ki, fahişəxanalar belə murdarlıqların qarşısını almalıdır.

Etiraf edim ki, “Azərbaycanda fahişəliyi leqallaşdırmağa dəyər?” sərlövhəsini gördükdə dərhal anladım: həm müəllifə, həm ekspertlərə bu çox lazımdır. Əks təqdirdə bu məsələni qabartmaq nəyə lazım idi? Axı bu təsisatlar ölkədə yoxdur və cavab “lazım deyil” olacaqsa, onda səs-küy qopartmağın mənası nədir? Məqaləni tam oxuduqdan sonra isə qətiyyən yanılmadığımı gördüm.

Sorğuya tam “təsadüfən” cəlb olunan ekspertlərin hamısı bir ağızdan tamamilə “təsadüfən” Azərbaycanda mütləq fahişəxanaların açılmasını alqışlayırlar.

Təbii ki, hər bir iddia arqumentlərə söykənməlidir. Ekspertlər də dəridən-qabıqdan çıxıblar ki, bu işin öhdəsindən gəlsinlər. Nəticədə də çox gülünc ifadələr meydana gəlib. Məsələn, klinika psixoloqu, seks-terapevt belə deyir: “Subaylar ya gərək öz özlərini məmnun etsinlər, ya da seksual əlaqələrə girsinlər”. İlahi, məntiqə bir bax! Subayların belə məhdud seçiminə yalnız acımaq olar. Amma bundan sonra seks-terapevt bir qədər də irəli gedir: “Fahişəxanalar olmadığı təqdirdə bir çoxları daimi olaraq intim haqqında düşüncələrə qapılırlar”. Bərəkallah! Yəni fahişəxanalar peyda olan kimi xalq kütləvi surətdə bu fikirlərdən azad olacaq?.. Və ya elə fizioloji mutasiyalar baş verəcək ki, intimə olan tələbat tamamilə qeybə çəkiləcək?

Nə qədər qəribə səslənsə də, ekspertlər arasında olan ilahiyyatçı da məmləkətimizdə fahişəxanaların açılması ideyasını alqışlayır. Arqumenti də ki, superdi, SUPER: “Leqal “dözümlük evləri”nin olmaması bəzilərinin zoofiliyaya meyl etməsinə gətirib çıxarır ki, bu da İslamda daha böyük günahdır”. Bu fenomenal açıqlamanı “həzm” etmək çox çətindir. Yaxşı, əgər məsələyə ilahiyyatçı qarışıbsa, İslamı yad edibsə, o zaman elə Allahın kəlamını xatırladaq bu insana: “Açıq və gizlin pis işlərə yaxın düşməyin” (Ənam, 151). Təsəvvür edirsiniz? Allah buyurur ki, pis işə yaxın düşməyin. Allahın kəlamlarını, şəriətini camaata çatdırmağı özünə peşə seçən biri isə tam əksini söyləyir. Axı sizə kim icazə verib ki, Allahın buyruqlarını redaktə edirsiniz? Günahların təsnifatını nəyə əsasən təqdim edirsiniz? Özünüzü nə sanırsınız?

Yaxşı, tutaq ki, Azərbaycanda bunlar istədikləri fahişəxanalar açıldı. Bəs bu müəssisələrin müştəriləri kim olacaq? Bəlkə ekspertlərin qeydlərinə qaldığı rayon və kənd cavanları? Əlbəttə ki, yox! Sadə kənd cavanı ehtirasını yatırmaq üçün durub paytaxta gələcək? Hansı pulla, hansı imkanla? Axı aşkar da olmasa, gizli yolla fahişəxana kimi fəaliyyət göstərən masaj salonları mövcuddur. Kimsə rayon kişilərinin oralara kütləvi surətdə axışmasına şahidlik edib?

Yeri gəlmişkən, masaj salonları haqqında. Son zamanlar hüquq mühafizə orqanları əksər belə müəssisələrin fəaliyyətini dayandırdılar. Bəlkə elə buna görə bu işlə məşğul olan “biznesmenlər” fahişəxanaların leqallaşdırılması söhbətini gündəmə gətiriblər? Kim bilir...

Sonda isə keçmişə kiçik səyahət etmək istərdik. Sovet Azərbaycanı SSRİ-nin tərkibində idi. Bəs gənclər o zaman seksual ehtiyaclarını necə ödəyirdilər? Yoxsa kimi harada gəldi zorlayırdılar, kütləvi surətdə zoofiliya ilə məşğul idilər? Axı SSRİ-də fahişəxana yox idi, fahişəliyə görə cinayət məsuliyyətinə cəlb edirdilər. Və...? İndiki gənc nəslin mənəvi baxımdan 70-80-ci illərdəki həmyaşıdlarından daha üstün olduğunu iddia edə biləcək normal insan tapılarmı? Odur ki, fahişəxanalara teşnə olan cənablar, camaatı gəlişigözəl sözlərlə aldatmaq lazım deyil. Fəsad hər ictimai formasiyada, hər dövlətdə, hər zaman kəsiyində elə fəsad olub, günah olub. Ona nə ad verirsiniz verin, ona nə don geyindirirsiniz geyindirin. Fəsadı qanuniləşdirmək isə - artıq cinayətdir. Xalqa qarşı, onun bu gününə və sabahına qarşı.