Parisdə terror aktı törədilənin səhəri artıq KİV-də müsəlmanların özünə bəraət qazandırma kampaniyasına start verildi. Bəzilərinə görə bu cinayətin arxasında ABŞ və İsrail, bəzilərinə görə isə Fransa xüsusi xidmət orqanları dayanıb. Belə bir şey ola bilərmi? Niyə də olmasın axı? Məgər dünyanın nəhəng güclərinin son illər ərzində həyata keçirdiyi siyasətə nəzər saldqıda məhz müsəlman ölkələrin və müsəlmanların qurbanlıq seçildiyini görmürükmü? İndi bu qlobal anti-İslam kampaniyasının aparılmasına xatir 5-10 avropalının başından keçmək böyük problemdirmi?

Amma bəziləri bir az da irəli getdilər, hadisələrin “sübutlu təhlilini” təqdim etdilər: iki yaralını eyni sanitar briqadası müşaiyət edirsə, yaralıların paltarı yoxdursa, bir yaralının başında tatu varsa, terror törədilən zaman küçədə Paris sakinləri var-gəl etmirsə (sanki dünyanın başqa şəhərlərində sakinlər atəş səsi eşidən kimi terrorçularla selfi etmək üçün küçələrə axışır) – vəssalam! Bu bir quramadır və ssenarisi də ən azından CİA-da yazılıb. Başqa, daha dayaz versiyalar irəli sürənlər də oldu. Amma kifayətdir. Bir an əl saxlayaq və sadə suala cavab verək: bütün bu səylərimizin ünvanı kimdir? Biz kimi inandırmaq istəyirik? Əgər özümüz özümüzü, müsəlmanları inandırmağa çalışırıqsa – heyif çəkilən əziyyətlərə! Yox, əgər hədəfimiz qeyri-müsəlmanlardırsa – yenə də, heyif əziyyətlərə. Niyə? Burda illər öncə gördüyüm bir karikaturanı xatırladım.

Ata kiçik yaşlı oğluna qapının kəndarından deyir: “Bala, mən gedirəm. Özünü yaxşı apar a! Ağlına da axmaq fikir-zad gəlməsin!” Otaq bom-boşdur. Tamamilə heç nə yoxdur. Bir küncdə bir balta var, digərində isə pişik. Qapı bağlanandan sonra əcəba uşağın beyninə hansı axmaq fikir gələ bilər, sizcə? İndi bu müsəlmanların başlarına gələnlər də buna bənzəyir ki, ata evə qayıdıb görür ki pişiyi kimsə baltalayıb. Ata nə fikirləşəcək, sizcə? Çox təəssüf ki, bu gün dünyada müsəlmanın məhz belə imici formalaşıb. Xristian, yəhudi, ateist bizi belə tanıyır. Bu imicin müəllifi də nə şiə, nə də sünni deyil. “Taliban”dı, “Əl-Qaidə”dir, İŞİD-dir. Biz ha çalışaq, ha şəkillərin, videogörüntülərin təhlilini təqdim edək – faydası yoxdur. Artıq pişik ölüb. Daha doğrusu, öldürüblər. Bəs, yaxşı, neyləyək? Möcüzəni necə reallaşdıraq, pişiyi necə dirildək? Üstümüzə qucaq-qucaq çirkab tökülməsini oturub gözləyək, sakitcə seyr edək? Yox, bu da çıxış yolu deyil. Bu gün güc, qüvvə, beyin, intellekt başqa səmtə yönəlməlidir. Bu gün müsəlmanlar dünyaya həqiqi İslamı tanıtdırmaq üçün səy göstərməlidirlər. Bu gün xristian Avropaya inkvizisiyanın xristianlığa aidiyyatı olmadığı kimi İŞİD-in, terrorun da İslama aidiyyatı olmadığını izah etmək lazımdır. Əlbəttə ki, bu bütün ümmətin üzərinə düşən vəzifədir. Amma unutmayaq ki, ümmət mücərrəd bir varlıq, anlayış deyil. Hər birimiz bu ümmətin bir zərrəsiyik. Məsuliyyətimiz də müvafiqdir, sabah verəcəyimiz cavab da.