Azərbaycanda, rayon mərkəzlərinin birində 4 mərtəbəli villa var. Hacıya məxsusdu. Deyilənə görə, hər mərtəbəsi bir arvad üçündür. Sonuncu dəfə həmin rayona səfərim vaxtı xəbər alanda, 4-cü mərtəbə hələ boş idi, sahibəsini gözləyirdi. Yerli sakinlərin sözlərinə görə, hacı söz verib ki, bu dəfə livanlı qızı alacaq, çünki onlar çox gözəl olurlar.

“Hə, noolsun?” Bu sual gözləniləndi. O da gözləniləndi ki, “bu kişi halal qazanırsa, xumsunu və zəkatını verirsə, kim ona gözün üstə qaşın var deyə bilər?” sualı ilə məni pərt etmək istəyənlər olsun. Amma məgər mən dedim ki o kişi haram yeyir? Ya İlahi vergilərdən yayınmaqda ittiham etdim onu? Xeyir, mənim elə məkirli planlarım yoxdur. Amma..

Deməli, bir rəqəmə diqqət yetirək. Azərbaycanda minimal əmək haqqı 105 manatdı. Qeyd olunan 4 mərtəbəli villanın ucaldığı yerlərdə məhz bu məbləğə göz dikənlər, hətta bundan məhrum olanlar da var. Həm o ərazilərdə, həm də Azərbaycanın bütün guşələrində maddi sıxıntıya görə nəinki 4 dəfə, hətta 1 dəfə ailə qurmaqdan vaz keçənlər də var. Məmləkətimizdə kirayələrdə həyatını çürüdən, hətta ən cəsur arzularında belə özünü ev sahibi kimi təsəvvür edə bilməyən gənclərimiz var. Sosial şəbəkələr ağır xəstəliklərə düçar olan, lakin müalicə üçün vəsait tapmayan vətəndaşların fotoları ilə doludur. Daha nələr, nələr... Və bu “nələr” arasında 4 mərtəbəli villa. Yenə də tələsməyin, bundan daha “xod gedənlərin” mövcudluğunu dəlil gətirməyin. Mən də bu məmləkətdə yaşayıram, bu “xod gedənləri” də görürəm. Amma onlardan bizə nə? Biz “öz həcimizdən” danışırıq. Bəli, “özümüzünkündən”. Çünki o birilərinin dinə heç bir aidiyyatı yoxdur. Zatən, insanlar bu dünyaya satılıblar, zahirlərindən, davranışlarından bəllidir. Başqa iddiaları da yoxdur. Amma bu “hacılar” axı dini, İslamı təmsil edir, yeri gələndə, lap elə gəlməyəndə də İslamın adından “guppuldadırlar”. Bizə o harınlamışları deyil, bunu, “öz hacımızı” göstərib irad tuturlar, bunu gözümüzə soxurlar.

Elə anlaşılmasın ki, Allahın işinə qarışmaq qədər yolumu azmışam, Onun yerinə fərman vermək qədər çaşmışam. Sadəcə olaraq düşünürəm: əgər Allahın yaratdığı bəndə naqis elmi və düşüncəsi ilə ətrafdakıların acınacaqlı durumu fonunda hansısa “hacının” zəkat və xumsu özünə “alibi” qərar verərək “şellənməsini” qəbul etmirsə, bunun nəinki İslama, ümumiyyətlə insanlığa həqarət olduğunu düşünürsə, o zaman Mütləq Ədalət sahibi bu “hacını” Qiyamət günü yuxarı başa çəgəcəkmi? “Bu həyat bir imtahandır” deməyə adət edən Hacı zənn edir ki 4 mərtəbəli villa, xüsusən də onun 4-cü mərtəbəsi İlahi suallar testinə ən tutarlı cavabıdır? Allaha xatir, məni inandırmağa çalışmayın ki, bu əməllər sırf Rəbbimizin razılığını qazanmaq, başsız qalan qadınların başına sığal çəkmək üçündür. Eləyə qalsa Azərbaycana nə gəlib ki? Yoxsa Livan…

Bir də ki, qəribə tendensiya yarandığı müşahidə olunur. Siğə edənlər, 4 arvad eşqi ilə yaşayanlar və bu arzunu reallaşdıranların böyük əksəriyyəti bunun böyük savab olduğunu deyir, isbatlamağa çalışır. Yəni bu addım sırf savab qazanmaq üçün atılıb, hə? Başqa heç nə, hə? Bütün savablar edilib, qalıb bir bu, hə? İnsan ətrafdakıları da, hətta özünü də aldada bilər. Amma Allahı… Yoxsa Onu da aldatdıqlarını düşünənlər var?

Bir xatırlatma zəruridir: İslam rasional və dinamik, həmişə müasir dindir. Bu din cəmiyyətdə pis təəssürat yaradacağı təqdirdə hətta müstəhəblərdən çəkinməyə çağırır. Mənimlə razı olmayan qardaşlarım sabah, İslamda müstəhəb əməl sayıldığına görə, gözlərinə sürmə çəkib, sağ qulaqlarına da sırğa taxıb məhləyə çıxsalar, bu “vid-fasonda” sosial şəbəkələrdə fotolarını paylaşsalar, nişanlanma və toyları haqqında bütün qohumları və tanışları xəbərdar etdikləri kimi siğələri haqqında da eyni ictimailəşdirmə yolunu tutsalar - əla! Hesab etsinlər ki, artıq məni “bağladılar”. Yox, bunu etmirlərsə… Onda bağışlayın, icazə verin elə öz fikrimdə qalım.

P.S. Peyğəmbərimiz (s) buyurub ki, Qiyamətdə hətta hallallara görə sorğu-sual olacaq. Belə…

P.P.S. Lütfən, Peyğəmbər (s) və imamların zövcələrini dəlil göstərmək qədər sadəlöhv olmayaq. O tam başqa bir məsələdir. Başa düşmək üçün O həzrətlərin yaşayış tərzi haqqında oxumaq kifayətdir.

P.P.P.S. Əbuzərin Müaviyyənin sarayına gələrək ona belə bir qəsr ucaltdığına görə tutduğu iradları da xatırlamaq yerinə düşər. Deyir, “sən acından mədəsinə daş bağlayan Peyğəmbərin davamçısısan?”. Sonra da bütün mümkün cavabların qarşısında sədd çəkəcək bir tərif səsləndirir: “Ey Əbu Süfyanın oğlu! Əgər bu sarayı xalqın puluna tikdirmisənsə - oğurluqdur, haqsızlıqdır! Yox, öz puluna tikdirmisənsə - israfdır, haramdır!”