İslam.az-ın müsahibi Qafqaz Müsəlmanları İdarəsinin Quba üzrə səlahiyyətli nümayəndəsi Hacı Naib Heybət oğlu Səttarovdur. Hacı Naib 1998-ci ildən bölgədə qurumun rəsmi nümayəndəsi kimi fəaliyyət göstərir.

- Hacı, din-dövlət münasibətlərinin hazırki vəziyyətini necə dəyərləndirərdiniz?

- Mən bir din xadimi kimi deyə bilərəm ki, dünyanın bir sıra yerlərində cərəyan edən hadisələrin ölkəmizdə də baş verməsinə icazə verməməliyik. Biz vətənimizdəki firavanlığa xətər yetirilməsinə zəmin yaratmamalıyıq, dövlətimizin və xalqımızın salamatçılığı üçün əlimizdən gələni əsirgəməməliyik. Çünki dövlətimiz salamat olarsa, bizim dinimiz də salamat olar. Dövlətimiz salamat olarsa, bizim milli- mənəvi dəyərlərimiz salamat olar.  İslam peyğəmbəri buyurub ki, “Vətəni sevmək imandandır”. İmanı olan hər bir şəxs vətəninin, dövlətinin, torpağının təəssübünü çəkməlidir. Mən bir azərbaycanlı kimi fəxr edirəm ki, ölkəmizdə, xüsüsilə də çox mürəkkəb region olan şimal bölgəsində dini durum sabit vəziyyətdədir. Bu region müxtəlif məzhəblərlə zəngin olan bir bölgədir. İslam dinindən başqa dinlərə məxsus təriqət nümayəndələrini də burda görmək mümkündür. Bundan başqa, region etnik qruplarla da zəngindir. Bütün bunlara baxmayaraq regionda birlik və vəhdət var.

- Regionda radikal qruplaşmalar, xüsusilə də vəhhabi quruplaşmaları problem yaratmırmı?

- Üzdə olmasa da, onlar daxildə öz istəklərini həyata keçirməyə cəhd edirlər. Yəqin inzibati orqanlar onlara nəzarət edirlər, bu günə qədər ciddi münaqişə vəziyyəti yaranmayıb. Ümid edirik ki, bundan sonra da qarşıdurmalar olmayacaq. Məscidlərimiz fəaliyyətdədir. Sağlam düşüncəli dindarlarımız da var, qeyriləri də. Radikal əqidəli məzhəblərin təsiri altına düşən insanlar da var ki, bu da xoşa gələn hal deyil. Amma ümumilikdə dövlətimizin mənəvi dəyərlərimizə göstərdiyi qayğını hamı görməli və dəyərləndirməlidir. Bu gün dövlətimizin şeyximizə verdiyi hər bir dəyər ümumi dinimizə, dindarlarımıza verilən dəyərdir. Ölkədə tolerantlıq çox yüksək səviyyədədir. Məscidlərlə yanaşı kilsələrin və sinanoqların dövlət tərəfindən təmir olunması, dağ yəhudiləri dini icmasının sədri Boris Somandiyevin dövlət tərəfindən xüsusi fərmanla təltif olunması dövlətin yüksək qayğısının nəticəsidir. Biz neçə illərdir ki, dağ yəhudiləri ilə milli və dini zəmində əməkdaşlıq edirik. Dindarlarımızın fəaliyyəti həqiqətən yüksək səviyyədədir. Onlar narkomaniya və alkoqolizmə qarşı ciddi mübarizə aparırlar. Bundan başqa məzhəblər arasında birlik əldə edilməsinə və bu birliyin saxlanılmasına çalışırıq.

- Orta məktəblərdə tətbiq olunan hicab probleminə münasibətinizi bilmək istərdik…

- İslam dini təkamül dinidir. İnsan radikal olmamalıdır. Azərbaycan dünyəvi bir dövlətdir. İslamda məcburiyyət yoxdur, könüllü və azad şəkilldə İslam dini qəbul edilməlidir və əqidə fərqinə varmadan dinə xidmət edilməlidir. Mən ölkəmizdə kiminsə məcbur edildiyini görmürəm. Hicab İslam dininin əsaslarından biridir. İran fundamentalizmini kənara qoysaq belə, Azərbaycanda tarixən analarımız, nənələrimiz və bacılarımız hicaba riayət ediblər. Ən çətin zamanlarda belə ana örpəyi müqəddəs sayılıb. Hicab bizim Natavanımızın, bizim Məshətimizin, bundan başqa İslam Peyğəmbərinin (s) qızı Fatimeyi Zəhra (s.ə) nəvəsi xanım Zeynəbin zinəti olub. Lakin bu məsləni qabartmaq olmaz, istəyər hicab taxar, istəməzsə taxmaz. Hicab Azərbaycanın milli–mənəvi dəyərlərindən biridir. Tariximizdən, soy kökümüzdən və keçmişimizdən gələn bir nemətdir. Bu məsələni qabartmaq, şişirtmək və qarşıdurmalarla gündəmə gətirmək xoşagəlməz bir şeydir.

Sonda demək istərdim ki, çox təəssüflər - bu gün fəaliyyət göstərən radikal və qara qüvvələr var. Azərbaycanın işıqlı sabahına kölgə salmaq istəyənlər var. Dövlət də, milli atributları da, rəhbəri də bizimdir. İstər dindar, istərsə də qeyri-dindarlar bunların təəssübünü çəkməlidir.

Çox təəssüfləndirici haldır ki, bəzi dindarlarımız başqa dövlətlərin maraqlarından çıxış edirlər. Əgər biz dinimizi, Quranı təbliğ etmək istəyiriksə, niyə digər ölkələrin dövlətçiliyinin təbliği altında onları təbliğ edək? Niyə bizim dindar insanlar xarici ölkələrə gedəndə Azərbaycanımızı tanıtmırlar, ancaq o dövlətləri gəlib burada təbliğ edirlər?

Bəziləri dövlətimizə, millətimizə və xalqımıza bağlı olan dindarlarımızı xüsusi bəhanələrlə ləkələyir, onları dövlət məmurları və xalqın yanında gözdən salaraq dövlət tərəfindən onlara qarşı addımlar atılmasına nail olur və dövlət adamlarının əli ilə onları vururlar. Daha sonra da xalqa üzünü tutub o insanı ətrafdakılara nümunə olaraq göstərir. Bu cür hadisələrdən sonra bəzi adamlarda dövlətə qarşı inamsızlıq artır.  Amma son zamanlar dövlətin də belə adamlara qarşı atdığı addımları gördününz. Ümüdvarıq ki, prezidentin bu cür məslələrdən xəbəri var, ümüdvarıq hər kəsə layiqli dəyər veriləcəkdir.