Tezliklə islam.az saytının yeni Qütb TV layihəsi fəaliyyətə başlayacaq. İslam.az saytının baş redaktoru Vüsal Əliyev SalamNews-a müsahibəsində layihə haqqında daha ətraflı məlumat verib.

- Qütb TV-ni ərsəyə gətirmək fikri necə yarandı?

- Bu layihə üzərində çoxdan düşünürdük. Əlbəttə islam.az, Allaha şükürlər olsun ki, kifayət qədər populyarlıq qazanmış və oxucu auditoriyasına malik saytdır. Heç vaxt populist başlıqlarla, qalmaqallı xəbərlərlə reytinqimizi artırmaq fikrində olmamışıq. Yəni islam.az-ın oxucu kütləsinin böyük əksəriyyətini birləşdirən ümumi xüsusiyyətlər ciddilik, məntiqi düşüncə tərzi, qaraguruhçuluqdan uzaqlıq, müasirlik, yüksək bilik səviyyəsi və müasir dünya görüşüdür. Bir sözlə, təvazökarlıqdan uzaq olsa da deməliyəm ki, bu günə qədərki fəaliyyətimizdən razı qala bilərik. Amma bununla yanaşı, anlayırdıq ki, müəyyən məsələlərdə fikirlərimizi, mövqeyimizi, bəzən isə hətta informasiyaları oxucularımıza istədiyimiz səviyyədə çatdıra bilmirik. Məhz elə buna görə də İnternet TV-yə böyük tələbat yarandı. İndi hazırlıq işləri tamamlanmaq üzrədir. İnşallah tezliklə dəyərli izləyicilərimizə QütbTV layihəmizi təqdim edəcəyik. Daha əvvəl isə təqdimat mərasimi keçirməyi planlaşdırırıq.

- Yeni internet TV-nin məhz Qütb TV adlandırılmasının səbəbi nədir?

- Yeni layihə üçün seçdiyimiz ad təsadüfi deyil. Məlum olduğu kimi, islam.az saytının təsisçisi olan Azərbaycan Respublikası Dini Araşdırmalar Mərkəzi (DAM) hələ 1999-2002-ci illərdə Аzərbaycan və rus dillərində o zaman üçün dini və ictimai mühitdə kifayət qədər tanınan “Qütb” adlı ictimai fikir jurnalını nəşr edirdi. Sonradan internetin inkişafını və gələcək perspektivini nəzərə alaraq islam.az saytı təsis edildi və jurnala ayrılan qüvvə internet saytın inkişafına istiqamətləndi. Hazırda saytımız geniş internet portal halına gəlib. İndi internet layihəmizin yeni mərhələsi olan internet TV-yə keçərkən vaxtilə maarifləndirmə sahəsində xeyli uğuru olan “Qütb” jurnalının adını və ənənəsini burada davam etdirməyi qərara aldıq.

- “Qütb” TV-nin əsas hədəfi nə olacaq?

- Əqlə, şüura, təfəkkürə üstünlük vermək. Əlbəttə, hər işimizin başında mənəviyyatı, əxlaqı görürük. Çünki, mənəviyyat, əxlaq yoxdursa, insan da yoxdur. Düşünürük ki, nə ictimai, nə siyasi, ümumiyyətlə, heç bir fəaliyyət mənəviyyatsız, əxlaqsız olmamalıdır. Təəssüf ki, son illər müasirləşmə adı altında əslində mənəviyyatsızlıq, əxlaqsızlıq təlqin olunur, insanlarımız bəzən özləri də bilmədən bu əxlaqsızlıq dənizində qərq olurlar, özlərini iradəsiz halda bu əxlaqsızlıq dalğalarının ixtiyarına buraxırlar. Biz bacardığımız qədər bu tendensiya ilə mübarizə aparacağıq. Düzdür, islam.az-ın adından da hansı amallara qulluq etdiyi aydın olur. Amma heç kim düşünməsin ki, biz sırf dindarlara hesablanan kanal açırıq. Bizim layihə, belə demək olarsa, orta statistik azərbaycanlıya hesablanıb.

- Efirdə hansı verlişlərə üstünlük veriləcək?

- Verilişləri planlaşdırarkən maksimal dərəcədə müasir tələbləri nəzərə almışıq. Anlayırıq ki, XXI əsrin insanının zamanı çox dəyərli və məhduddur. Odur ki, mümkün qədər lakonik, eyni zamanda kreativ olmağı qarşımıza məqsəd qoymuşuq. Müəyyən mənada, bu, bizim efirə gedəcək verilişlərimiz üçün seçdiyimiz adlardan da sezilir: “Sözün mustafası”, “Çərçivəsiz”, “Dəvət”, “Soruşun ki, biləsiniz”, “Vedrə”, “Dinimizin əlifbası” və s.

- Qütb TV-nin ilk verilişinə konkret nə vaxt baxmaq mümkün olacaq?

- Qarşımıza məqsəd qoymuşuq ki, Ramazanın 1-də ilk verilişimizi izləyicilərimizin mühakiməsinə təqdim edək. Bilirik ki, Ramazan Allahın rəhmət və bərəkət ayıdır. Odur ki, bütün qüvvəmizi səfərbər edib bu məqsədimizə yetişmək üçün çalışırıq.