Həzrət Əlinin (ə) məzarının Harun ər-Rəşid tərəfindən tapılması və üzərində ilk məqbərə tikilməsi barədə rəvayət nə dərəcədə düzgündür? Axı, Harun ər-Rəşid Əhli-beytə düşmən idi.

Əvvəla, Abbasi xəlifələrinin və daha sonra yaşamış bəzi hökmdarların həyatında belə ziddiyyətli məqamlar az olmayıb. Onlar bir yandan guya Əhli-beyti sevdiklərini nümayiş etdirir, bir yandan da imamları və onların tərəfdarlarını məhv edirdilər. Harunun oğlu Məmun guya İmam Rzaya (ə) hörmət üzündən Onu özünə vəliəhd etdi, sonra da zəhərlədi. Teymurləng Xorasanda şiələrin başından qüllə düzəldir, sonra da Diməşqdə Həzrət Səkinənin məzarını təmir etdirirdi. Bu, həmin hökmdarların riyakarlığını göstərir.

İkincisi, Abbasilər Əməvilərdən fərqli olaraq, Peyğəmbərin nəsli ilə düşmən olduqlarını açıq söyləmirdilər; çünki özləri hakimiyyətə gəlmələrini Peyğəmbərlə qohum olmaqları ilə izah edirdilər. Bu üzdən Həzrət Əlinin (ə) adına qarşı aşkar hörmətsizlik etmirdilər. Onların Əhli-beytlə düşmənliyi daha çox siyasi səbəblərə dayaqlanırdı, imamları öz hökumətlərinə təhlükə kimi görürdülər.

Üçüncüsü, Həzrət Əlinin (ə) məzarının uzun müddət gizli qaldıqdan sonra necə kəşf olunması haqqında başqa rəvayətlər də var. Harun ər-Rəşidlə bağlı rəvayəti isə bəzi mötəbər mənbələrdə oxuya bilərsiniz. Məsələn, Şeyx Müfid – “Əl-İrşad” (I, 26); Deyləmi – “İrşadül-qülub” (səh. 435); “Biharül-ənvar” (cild 42, səh. 224); Reyşəhri – “Mövsuətül-İmam Əliyyibni Əbitalib” (VII, 295-296) və s.