İmam Riza (ə) Harunun xəlifə olduğu müddətdə yaranmış fürsətdən istifadə edib öz İmamətini aşkar edir və bu barədə ata-babalarından fərqli olaraq heç də, təqiyyə etmirdi. Hətta o Həzrətin bəzi dostları onu bu işindən çəkindirir, İmam (ə) isə onları arxayın edib buyururdu ki, Harundan ona heç bir xətər toxunmayacaq.

Səfvan ibn Yəhya deyir: “İmam Kazim (ə) vəfat etdikdən sonra İmam Riza (ə) İmamət məqamını aşkar etdikdə, o Həzrətə deyildi: “Siz çox məsuliyyətli bir işi aşkar edirsiniz, biz bu zalımı (Harunu) sizin üçün çox təhlükəli sanırıq.”

İmam Riza (ə) buyurdu: “O, nə qədər çalışsa da, mənə bir şey edə bilməyəcək.”  Həmçinin, Məhəmməd ibn Sənan rəvayət edib deyir ki, Harun xəlifə olduğu vaxt İmam Rizaya (ə) dedim: “Harunun qılıncından hələ də qan damcıladığı halda, siz İmamət məqamınızı aşkar edərək atanızın yerinə keçmisiniz”. İmam Riza (ə) buyurdu: “Peyğəmbərin (s) sözü mənə qüvvət verərək məni cürətləndirir. O Həzrət buyurmuşdur: “Əgər Əbu Cəhl mənim başımdan bir tük əskik edərsə, onda mən heç Peyğəmbər deyiləm”. Mən də sizə deyirəm ki, əgər Harun mənim başımdan bir tük əskik edərsə, onda mən də, heç İmam deyiləm”.

Göründüyü kimi, İmamın təqiyyə etməməsinin başlıca səbəbi Allahın qüdrəti ilə bəxş edilən əzəli elmi sayəsində zalım hökmdardan ona heç bir xətər toxunmayacağına dair əminlik idi.