Azərbaycan sakinlərinin böyük əksəriyyəti bilir ki, Bakıdakı Səadət Sarayı 19-cu əsrin sonlarında – 20-ci əsrin əvvəllərində yaşamış milyonçu Murtuza Muxtarovun vəsaitləri hesabına inşa olunub. Amma həmyerlimizin tikdirdiyi məsciddə müsəlmanların bu gün də ibadət etdiklərindən xəbəriniz varmı?

Muxtarov məscidi Vladiqafqazda, Terek çayının sol sahilində yerləşir. Məscid şəhərin rəmzidir və memarlıq abidəsi kimi dövlət tərəfindən mühafizə olunur. İnşaat üçün icazə 1900-cu ildə verilib. Məscidin tikintisi 80 min rubla başa gəlib ki, bu məbləğin 50 minini Murtuza Muxtarov ödəyib. Məscid 1908-ci il oktyabrın 14-də istifadəyə verilib.

Daha bir maraqlı fakt. 1934-cü ildə Şəhər rəhbərliyi məscidin sökülməsinə dair qərar qəbul edib. Lakin 84-cü Süvari Alayının 25-ci Tatar taqımının komandiri Y.İ.Betkenev tabeliyində olan əsgərlərə Allahın Evinin müdafiəsinə qalxmağı əmr edib. Hakimiyyət geri çəkilmək məcburiyyətində qalıb və məscidə memarlıq abidəsi statusu verib. SSRİ dövründə məsciddə Diyarşünaslıq muzeyinin filialı fəaliyyət göstərib.