Şeyx Yusuf Kardavinin “əl-Cəzirə” kanalı ilə çıxış edərək, Suriya hakimiyyəti ilə əməkdaşlıq edənlərin hamısının, o cümlədən mülki vətəndaşların və ailimlərin də qətlinə fətva verməsi dünyada, o cümlədən Azərbaycanda ciddi əks-səda doğurub. Bu fətvaya rəy bildirmək üçün islam.az ilahiyyatçı-alim Hacı Ağabala Mehdiyevə müraciət edib.

Müsahibimiz bildirdi ki, din və səmavi təlimlər Allah tərəfindən fərd və cəmiyyəti islah etmək, bəşəriyyətin dünya və axirət səadətini təmin etmək üçün göndərilib: “Tarixə nəzər salanda görürük ki, İslam Peyğəmbərinin (s) mübarizə apardığı mühüm şeylərdən biri cəmiyyətdəki yersiz təəssübkeşlik və təfriqəni aradan qaldırmaq olub. Allahın Rəsulu (s) buna nail də olub. Peyğəmbər cahil ərəblərin on illərlə bir-birinə qarşı apardığı müharibələrə son qoyub, onlar arasında sülh yaradıb. Amma çox təəssüf ki, tarix boyu özünü bu dinin təmsilçisi sayan “alim”lər məhz həmin təəssübkeşlik və təfriqə alovunu şölələndiriblər və bu gün də həmin işi görürlər”.

A.Mehdiyev bildirdi ki, İslam alimlərin qələminin mürəkkəbini şəhidlərin qanından üstün dəyərləndirmişdir. Bunun səbəbi isə alimin insan və cəmiyyətin, ümumilikdə bütün bəşəriyyətin islah edilməsində oynadığı roldur. Amma bununla yanaşı İslam, alimin büdrəməsini və səhv addım atmasını bütün aləmin fəsada düçar olması kimi qiymətləndirir.

“Kardavının son günlər Suriya barədə verdiyi bəyanat “alimin büdrəməsi aləmin fəsadına səbəb olar” hədisinin ən bariz nümunələrindən sayıla bilər. Çünki onun muzdlu döyüşçüləri hətta mülki vətəndaşların öldürülməsinə səsləməsi minlərlə insanın nahaq qanının axıdılmasına rəvac verməkdən əlavə, onsuz da Suriyada qızışdırlmaqda olan məzhəb qarşıdurmalarını daha da gücləndirəcək. Təbii ki, Suriyada məzhəb qarşıdurmasının yaranması təkcə Suriya sərhədləri çərçivəsində qalmayacaq və tədricən bütün dünyaya sirayət edəcək. Suriyada vuruşan muzdlular onsuz da bundan əvvəl də sirf məzhəb müharibəsi aparırdılar. Son günlərdə onların şiə məscidini yandıraraq bu münasibətlə “şükr səcdəsi” etmələri onların hədəflərindən xəbər verirdi. Bəziləri bunu ilk baxışda nadan və cahil adamların əməli kimi yozmağa cəhd etsələr də, Qərdavi kimi “alim”lərin sözügedən fitvasını nəzərə alanda bütün bunların təsadüfi olmamasını başa düşmək mümkündür. Eyni zamanda bir neçə il bundan əvvəl Kardavidən ayrılmış həyat yoldaşının onu İsrail xüsusi xidmət orqanları ilə gizli əlaqələrinin olmasında ittiham etməsini də nəzərə alsaq, hadisələrin baş verməsində elə də uyğunsuzluq görmək olmur. Kardavının “youtub”da Bəşər Əsədi mədh edən video müsahibələri var. Məgər Bəşər Əsəd dünən demokrat və ədalətli idi ki, Qərdavi onu bu qədər tərifləyirdi? Yaxud, əgər Kardavi dünənə kimi zalımlara qarşı çıxmağı caiz bilmirdisə və bu gün fikri dəyişdiyi üçün zalıma qarşı qiyamı vacib sayıb camaatı Suriyada üsyan və kütləvi qətlə səsləyirsə, həmin işi yaşadığı Qətər barəsində niyə etmir? Məgər Qətər hakimiyyəti Suriyadan demokratik və ədalətlidir? Olmaya Kardavinin eyni cəbhədən çıxış etdiyi və Suriyada vuruşan müzdluları maliyələşdirən Səudiyyə rejimi demokratik rejimdir? Bəs necə olur Kardavi kimilər, məsələn, Səudiyyə və Qətərdən söhbət düşəndə insanları krala itaətə səsləyir, onlara qarşı çıxmağı haram sayır, Suriyadan söhbət düşəndə isə zülmə qarşı çıxmağa səsləyir?!”, - Ağabala Mehdiyev dedi.

Onun sözlərinə görə, digər tərəfdən, Kardavinin oğlu bir neçə il bundan əvvəl şiəliyi qəbul edib və bu, İslam dünyasında məşhur sima kimi Kardavinin nüfuzuna böyük zərbə vurub: “Kardavinin bundan sonra şiələrə qarşı aşkar çıxışlar etməsi daha da artıb və o, sanki oğlunun öz məzhəbini dəyişməsində bütün şiə aləmini günahkar bilir və buna görə də açıq-aşkar şiələrə qarşı çıxışlar edir. O, son dövrlərdə internetdə internetdə yayımlanan çıxışlarının birində deyir: “Məndən soruşurlar ki, sən Tunis inqilabı barədə danışırsan, Misir inqilabı barədə danışırsan, Liviya və Yəmən inqilabları barədə danışırsan, amma Bəhreyn inqilabı barədə danışmırsan, niyə? Çünki adı çəkilən ölkələrdə inqilabı xalq etmişdi..... Bəhreyndə isə xalq deyil, təriqət inqilabıdır. O inqilabın problemi budur ki, onlar sünnilərə zidd olan şiələrdir.”

Bütün bunlar göstərir ki, Qərdavınin bu kimi düşünülməmiş və İslama zidd fitvaları onun məzhəb təəssübkeşliyindən qaynaqlanır (hələ digər versiyaları nəzərə almasaq) və o, bir günahsızın ölümünü bütün insanların ölümü kimi qiymətləndirən İslamın adından danışaraq, bu dinə ən böyük zərbəni vurur. Allah İslam ümmətini və bəşəriyyəti bu cür “alim”lərin şərindən qorusun!”.