Dekabrın 21-i yaxınlaşır. Planet sakinlərinin bir qismi bu tarixi böyük həyəcanla gözləyir. Səbəb isə Maya təqvimi ilə məhz 2012-ci il dekabrın 21-də dünyanın sonunun göstərilməsidir. Kimlər üçünsə bu olduqca vacib bir tarix olsa da, əksəriyyət “dünyanın sonuna” hazırlıqları təbəssümlə qarşılayır.

Əslində, bu da anlaşılandı. Bəşər tarixində dəfələrlə buna bənzər hadisələr yaşanıb, əhali təşvişlə Qiyamətə hazırlaşıb, amma nəticədə heç bir qlobal faciə meydana gəlməyib. Günlər, aylar, fəsillər və illər bir-birini əvəzləməkdə davam edib. Tarixə ötəri bir nəzər salaq.

Əsasən xristian təmayüllü cərəyanlar 33; 666; 900; 999; 1000; 1013; 1033; 1492; 1584; 1666; 1844; 1899; 1900; 2000 və 2011-ci illərdə dünyanın sonu olacağına dair proqnozlar veriblər. Hazırda bu yazını oxumağınız sözügedən proqnozların nəticələri haqqında fikir yürütməyə əsas verir. Bundan əlavə tarixdə çox sayda digər “öngörmələr” olub. Onların yalnız bir qismini qeyd etməklə kifayətlənəcəyik. Məsələn, əslən ilk fransalı Roma papası olan II Silvestr bəyan etmişdi ki, dünyanın sonu 1000-ci il yanvarın 1-də gələcək. Bu proqnozun doğrulmaması ciddi faciələrə yol açdı. Belə ki, papaya kor-koranə inanan avropalılar hamılıqla o biri dünyaya səyahətə hazırlaşdılar: nə əkən oldu, nə də biçən. Amma qışın oğlan çağında qəfildən dünyanın sonu gəlmədi. Növbəti ilin hansı qıtlıqla və aclıqla müşayiət olmasını ancaq təsəvvür etmək mümkündür. Nəticədə neçə-neçə insan elə “Qiyamət” deyə-deyə bu dünya ilə vidalaşdı.

1900-cu il noyabrın 1-ni “Qırmızı ölüm” təriqəti davamçılarının bəşəriyyətin son nəfəsi kimi dəyərləndirmələri də insan tələfatı ilə müşahidə edilidi. Belə ki, Rusiyada fəaliyyətdə olan bu inanca tapınanlardan təqribən 100 nəfər özlərini yandırmaqla həqiqətən də həyatları üçün Qiyaməti qopardılar.

İtaliyalı uşaq həkimi Elio Blanko isə ABŞ-ın məxfi bombasının partlaması nəticəsində dünyanın son dəqiqəsini belə “müəyyənləşdirib” – 1960-cı il iyulun 14-ü saat 13:45. Bu hadisəyə hazırlıq məqsədi ilə onun tərəfdarları hətta dağda xüsusi sığınacaq da hazırlayıblar ki, bütün bəşəriyyət məhv olduqdan sonra mövcudluqlarını davam etdirsinlər. Amma təyin edilən vədə yetişsə də, təbii ki, heç bir fövqəladə hadisə baş verməyib və dağdakı süni mağara da istifadəsiz qalıb.

Ümumiyyətlə, tarixdə dünyanın sonuna hazırlıq məqsədi ilə sığınacaqlar inşa edənlər kifayət qədər olub. Məsələn, 1967-ci il dekabrın 25-də dünyanın sonunu gözləyən Danimarkanın Orton Yensen kilsəsinin davamçıları yeraltı bunker hazırlamışdılar. 1980-ci il aprelin 29-da nüvə müharibəsi nəticəsində Məhşər gününü gözləyən Leland Censen və Çarlz Geynz bəhai cərəyanının üzvləri isə ABŞ dağlarında xüsusi sığınacaqlar qurmuşdular.

Bu misalları davam etdirmək də olar. Amma aydındır ki, bunların hamısı əsası olmayan iddialardan savayı bir şey deyil. Həqiqəti tam qətiliklə yəqin etmək lazımdır: Qiyamət yalnız Allahın izni ilə qopacaqdır və bu hadisənin nə zaman baş verəcəyini də, yalnız O bilir.

P.S. Dekabrın 21-indən sonra həyat davam edəcək. Lakin Qiyamət proqnozları bununla bitməyəcək. Çünki hələ “alimlərin” təyin etdikləri neçə-neçə Qiyamət tarixləri gözləməkdədir: 2021, 2036, 2242, 2892, 3797 və s.