BMT-nin Baş Assambleyası Fələstinə bu təşkilatda müşahidəçi dövlət statusu verilməsinə dair qətnamə qəbul edib.

İslam.az-ın SalamNews-a istinadən verdiyi xəbərə görə, təşkilata üzv 193 dövlətdən 138-i qətnamənin lehinə, 9-u əleyhinə səs verib, 41 dövlət “bitərəf” qaldığı halda, qalan dövlətlər səs verməkdən imtina ediblər. 

Qətnamədə fələstinlilərə öz müqəddəratını təyin etmək və 1967-ci il sərhədlərində müəyyən olunmuş Fələstin dövlətini yaratmaq hüququ təsdiq olunub.

İndiyə kimi Fələstin BMT-nin müşahidəçi subyekt statusuna malik olub. Müşahidəçi dövlət statusu fələstinlilərə İsrailə qarşı Haaqa Beynəlxalq Cinayət Məhkəməsinə müraciət etmək imkanı verəcək. Fələstin diplomatları qazandıqları bu “qələbə”nin Yaxın Şərqdə 2 müstəqil dövlətin mövcudluğu ilə həll ediləcək İsrail-Fələstin danışıqlarına müsbət təsir göstərəcyinə ümid edirlər.

İsrail tərəfi bu addımın əks təsirə malik olacğı qənaətindədir. ABŞ da Fələstinin müstəqillik qazanması üçün birbaşa İsraillə danışıqlara getməli olduğunu düşünür.

Qeyd edək ki, qətnamənin əleyhinə ABŞ, İsrail, Çexiya, Kanada, Panama, həmçinin, bir necə cırtdan ada dövləti, o cümlədən, Mikroneziya, Palau, Nauru, Marşal adaları səs veriblər.