Həcc ziyarətində olan azərbaycanlı zəvvar – 1947-ci il təvəllüdlü Bakı sakini Sadıxov Təbib Süleyman oğlu vəfat edib.

Bu barədə islam.az-a Qafqaz Müsəlmanları İdarəsinin (QMİ) mətbuat xidmətinin rəhbəri Rəhimə Dadaşova məlumat verib.

O deyib ki, Məkkədən Mədinəyə gedən avtobusda halı pisləşən zəvvarımıza ilkin tibbi yardım göstərildikdən sonra o, təcili yardım vasitəsilə yaxındakı xəstəxanaya çatdırılıb. Lakin bütün cəhdlərə baxmayaraq, zəvvar ürək çatışmazlığından dünyasını dəyişib. 

Mərhum üçün QMİ-nin rəsmiləri, ruhanilərimiz və hacılarin iştirakı ilə cənazə namazı qılınıb. Həcc əməllərini tam şəkildə yerinə yetirmiş Təbib Sadıxov Bəqi qəbirstanlığında dəfn olunub.

Allah rəhmət eləsin!

QMİ sədrinin birinci müavini Hacı Salman Musayevin verdiyi məlumata görə, azərbaycanlı zəvvarların sağlıq durumları normaldır, hec bir ciddi problem yoxdur.

Xatırladaq ki, Həcc ziyarətində vəfat edən zəvvarların sayı iki olub. Belə ki, oktyabrın 20-də Həcc ziyarətində olan 1947-ci il təvəllüdlü Bakı sakini Raziyə Hidayətova da dünyasını dəyişib.