Azərbaycanın Pakistandakı səfiri Daşqın Şikarov bu ölkənin xarici işlər naziri Hina Rabbani Xar ilə görüşüb.

Səfirlikdən SalamNews-a verilən məlumata görə, görüşdə Azərbaycan-Pakistan əlaqələrin hazırkı vəziyyətindən danışılıb. D.Şikarov siyasi əlaqələrin yüksək səviyyədə olduğu halda iqtisadi münasibətlərin hələ də mövcud potensiala cavab vermədiyini deyib.

Səfir Ermənistan-Azərbaycan, Dağlı Qarabağ münaqişəsi də daxil olmaqla digər məsələlərdə Pakistanın ölkəmizə göstərdiyi dəstəyə görə təşəkkürünü bildirib. Diplomat Pakistanın BMT Təhlükəsizlik Şurasına qeyri-daimi üzv seçilməsi münasibətilə təbriklərini çatdırıb, bu mötəbər təşkilatda ölkəmizin üzvlüyünü dəstəklədiklərinə görə minnətdarlıq edib.

Səfir dekabrın 6-7-də Bakıda keçiriləcək Azərbaycan-Pakistan hökumətlərarası komissiyanın V iclası ilə bağlı aparılan hazırlıq işləri haqqında nazirə məlumat verib.

Görüşdə Pakistanın Sind əyalətində sel daşqınlarından zərər çəkmiş insanlara Azərbaycan hökuməti tərəfindən 2 milyon ABŞ dolları məbləğində yardımın ayırdığı da bildirilib.

Pakistanlı nazir ölkəsinin Ermənistan-Azərbaycan, Dağlıq Qarabağ məsələsində Azərbaycanı tam dəstəklədiyini, ermənilər tərəfindən işğal olunmuş torpaqlarımızın qeyd-şərtsiz azad edilməsinin vacibliyini vurğulayıb. Nazir Azərbaycanın BMT TŞ-na qeyri-daimi üzv seçilməsini ölkəmizin xarici siyasətinin böyük uğuru kimi qiymətləndirib.

Azərbaycan ilə Pakistan arasında iqtisadi əlaqələrə də toxunan H.Xar vurğulayıb ki, ölkələrimiz enerji, yüngül sənaye, əczaçılıq, kənd təsərrüfatı sahələrində də əməkdaşlıq edə bilərlər. Nazir ölkəsinin çətin günündə daim yanında olduğuna, təbii fəlakətlər zamanı göstərdiyi dəstəyə görə Azərbaycan xalqına, Prezident İlham Əliyevə və Heydər Əliyev Fondunun Prezidenti Mehriban xanım Əliyevaya minnətdarlığını bildirib.