Oxucu sual verir: Əməllərinin düzgünlüyünə əmin olmaq üçün onları ardıcıl bir neçə dəfə təkrar edən vasvası adamın ibadətləri hansı hökmdədir?

Vasvasılıq psixologiyadan qaynaqlanan arzuolunmaz bir haldır. Vasvasılıq insan üçün artıq problemlər yaradır, onu gərginlikdə saxlayır, zehni və fiziki mənada yorur, vaxtını alır. Ona görə şəriətimiz dini hökmlərdə vasvasılıq etməyi bəyənmir və bundan xilas olmağı tövsiyə edir. Hətta şəriətdə deyilir ki, vasvasılıq edən və özü də bunu bilən şəxs gərək şübhələrə etina etməsin. Məsələn, bir əşyanı yuyanda pak olub-olmadığına vəsvəsə edən adam şəriətdə buyurulmuş tərzdə yuduqdan sonra “görəsən düzgün yudummu, yumadığım hissə qalmadı?” kimi şübhələrə məhəl qoymasın və etdiyi əməlin düzgünlüyünə inansın. Bununla belə, vasvasılıq əməli batil etməz. Bir şəxs vəsvəsədən xilas ola bilmirsə və hər hansı əməli dəfələrlə təkrar edirsə (şəriəti pozmamaq şərti ilə), onun əməli batil deyil. Amma özünü əziyyətə salmamaq üçün vəsvəsədən azad olmağa çalışmalı, lazım gələrsə hətta psixoloqa müraciət etməlidir. Unutmayaq ki, İslam asanlıq dinidir, çətinlik dini deyil.