Bu gün Bakıda "Təzə Pir" məscidində Fitr bayramı münasibətilə bayram namazının qılınması baş tutmayıb.

Dünən mətbuatda avqustun 30-da Bakı vaxtı ilə saat 10:00-da ölkənin bütün məscidlərində bayram namazının qılıncağı barədə məlumat yayılmışdı.

SalamNews-un müxbirinin araşdırması nəticəsində məlum olub ki, bayram namazı yeni ayın görünməməsi səbəbindən qılınmayıb. Qafqaz Müsəlmanları İdarəsinin adının açıqlanmasını istəməyən nümayəndəsi bildirib ki, böyük ehtimalla namazın qılınması sabah baş tutacaq.

Bildirək ki, Bakının "İlahiyyat", Qaraçuxur qəsəbəsində yerləşən məscid, həmçinin bir neçə digər məscidlərdə səhər saat 08:00-da bayram namazı qılınıb.

SalamNews agentliyinin kollektivi də qarşıdan gələn Fitr bayramı münasibətilə bütün Azərbaycan xalqını, müsəlmanları, həmçinin müqəddəs ay ərzində oruc tutmaqla islam qanunlarına riayət edən bütün dindarları təbrik edir. Hamıya Allahdan bağışlanmasını və xoşbəxtlik arzulayırıq!