Oxucu sual verir: Adam hər hansı səbəb üzündən günorta namazlarını vaxtında qılmayıb. Məğrib azanına kimi lap az vaxt qalmışsa, zöhr və əsr namazlarını bu vaxta yerləşdirmək mümkün deyilsə, nə etməlidir?

Əvvəla, onu qeyd edək ki, namazları vaxtın əvvəlində qılmaq çox təkid edilən müstəhəb əməllərdəndir. Qəsdən namazları təxirə salmaq və vaxtın sonuna kimi yubatmaq şiddətlə məzəmmət edilir. Əgər insan zöhr və əsr namazlarını qılmayıbsa, məğrib azanına nə qədər vaxt qaldığına diqqət yetirməlidir. Müstəhəb əməlləri yerinə yetirmədən, yalnız vacib əməlləri etməklə hər namaza nə qədər vaxt sərf etdiyini də hər kəs özü bilir. Əgər məğrib azanına 5 rükət namaz qılmaq qədər vaxt qalıbsa, o halda əvvəlcə zöhr namazını, dərhal ardınca da əsr namazını qılmalıdır (yalnız namazın vacibatını teməklə). Çünki zərurət halında namazın bir rükətinin öz vaxtında qılınması, qalan rükətlərin isə vaxtdan kənara çıxması icazəlidir. Əgər məğrib azanına kimi 4 və ya ondan az rükət qılmaq qədər vaxt qalırsa, bu halda əvvəlcə əsr namazını əda niyyəti ilə qılmalı, ardınca zöhr namazını qəza niyyəti ilə yerinə yetirməlidir.