Oxucu sual verir: Cəfəri-kəzzab kim olub?

Tarixdə Cəfəri-kəzzab, yəni yalançı Cəfər kimi tanınan şəxs on birinci imam Həsən Əsgərinin (ə) böyük qardaşıdır, yəni İmam Mehdinin (ə) əmisidir. Tarixdə bəzi müqəddəs şəxslərin yaxınları, hətta ailə üzvləri haqq əqidəsindən azmış və batil yola düşmüşlər. Məsələn, Həzrət Nuhun (ə) oğullarından biri Allaha iman gətirməmiş və tufan zamanı məhv olmuşdu. Cəfər də hələ İmam Həsən Əsgərinin (ə) zamanında özünü imam elan etmiş və qardaşı ilə mübahisəyə qalxmışdı. İmam Əsgərinin (ə) vəfatından sonra Cəfərin imamət iddiası daha da gücləndi. O, iddia edirdi ki, guya İmam Əsgərinin (ə) oğlu yoxdur. Cəfərin imamlıq iddiası o zamankı hakimiyyət tərəfindən də dəstəklənirdi. Çünki Abbasilər şiə əqidəsini zəiflətmək üçün Cəfərdən istifadə etməyi qərara almışdılar. Cəfər şiələrin bir hissəsini aldadıb öz tərəfinə çəkməyə nail oldu. O, İmam Əsgərinin (ə) şəhadətindən 11 il sonra ölmüşdür. Onun tərəfdarları cəfəriyyə məzhəbi adı altında bir müddət mövcud olmuşlar, daha sonralar bu məzhəb aradan getmişdir. Yalançı imamət iddiasına görə Cəfər “kəzzab” (yalançı) ləqəbi ilə xatırlanır.