Fətullah Gülən fenomeni ABŞ mediasında son zamanlarda daha çox gundəmə gəlməyə başlayb. Bu həftə ABŞ-ın əhəmiyyətli siyasi jurnallarından "The New Republic"də Fəthullah Gülən haqda geniş bir məqalə dərc edilib.

Jurnalın əməkdaşı Suzi Hansen, "Qlobal İmam" adlı məqaləsində ABŞ-ın Texas ştatından Türkiyənin Adana vilayətinə qədər Fətullah Gülənin başçılıq etdiyi Nurçuluğu araşdırmağa çalışdığını bildirir: "Hərhalda Türkiyədə Fətullah Gülənin adını eşitməyən yoxdur. Ona inanan da, inanmayan da F.Gülənin "Nur Camaatı" hərakatının Türkiyədə ciddi bir ictimai faktor və siyasi güc halına gəldiyini təsdiq edir. Artıq Ankarada siyasi söhbətlərdə insanlar uzun uzadı hərakatın və onun rəhbərinin adını xatırlamaqdansa qısaca "camaat" deyir."
Əlbətdə ki, medalyonun bir görünən, bir də görünməyən tərəfi var. Nur Camaatının F.Gülən pərəstişkarları tərəfindən dəstəklənən məktəbləri, media yayım orqanları, QHT-ləri və s.-dən əlavə bir də kimsənin tam olaraq bilmədiyi bir qərar qəbul etmə mexanizmi və daxili iyerarxiyası var. Yalnız "Camaat"da xüsusi kod adları olan bir neçə nəfərdə başqa heç kim tam məlumata sahib deyil hərakat haqqında.
Fətullah Gülənin ABŞ-dakı müəmmalı fəaliyyəti necə ört-bastır edilir? Niyə rəsmi Vaşinqton F. Gülənin ABŞ-da və dünyadakı fəaliyyətinə şərait yaradır?
Fətullah Gülən 1999-cu ildən bəri ABŞ-da yaşayır. Müxtəlif vaxtlarda onula görüşən jurnalistlər və ya tərəfdarları vasitəsilə türk ictimaiyyətiylə nizamlı olaraq ünsiyyətdədir.
Halbuki, Vaşinqtonda yaşayan üç-beş eksperti saymasaq, sadə amerikalı vətəndaşlar Pensilvanyada Fətullah Gülən deyə birinin yaşadığından xəbərdar deyil.
Qəribədir. Çünki ABŞ-da yayımlanan hər hansı bir qəzeti açsaq, müsəlman aləmi ilə əlaqədar heç olmasa 3-4 xəbər, bir neçə məqalə görərik. Əslində amerikalılar səhərdən axşama qədər İslamı, öz aralarında yaşayan müsəlmanları, ya da İslam dünyasındakı prosesləri müzakirə edir, amma bu sadə amerikalılar öz ölkələrindəki Fətullah Gülən və onun "Nur Camaatı"nadan xəbərdar deyillər.
Nurçuların ABŞ-da səssiz, lakin getdikcə yayılan məktəbləri, litseyləri, "yardım" fondları, QHT-ləri və hətta Vaşinqtonda lobbi quruluşları var, amma amerikan mediasında "Camaat"la əlaqədar bu zamana qədər yalnız 2 məqalə dərc edilib.
Bunlar da, Mavi Marmara böhranı zamanı Gülənin "Wall Street Journal" və "New York Times"a verdiyi reportajlar olub.
Lakin görünür Gülən və Nurçuluq fenomeni, "camaat"ın və rəsmi Vaşinqtonun istəklərinin əksinə olaraq amerikan mediasında da yavaş-yavaş maraq oyandırmağa başlayır.
Amma media nurçuların mürəkkəb"quruluşu"nu anlamaqda çətinlik çəkir.
Bir neçə əhəmiyyətli jurnal və qəzet, mövzunu son dövrdə öz gündəminə almış, ancaq Nurçuluğun yarı-açıq, yarı-bağlı və yarı-mərkəzləşləşdirilmiş, yarı-dağınıq quruluşunu araşdırmağın qəlizliyindən çətinlik çəkərək hələ də bu araşdırmalarına başlaya bilməmişlər.

"The New Republic"in əməkdaşı Suzi Hansen isə öz araşdırmasında Fətullah Gülənin "Nur Camaatı" haqqında indiyə qədər heç kimə məlum olmayan bir neçə məlumatı gün işığına çıxara bilib. Məsələn: F.Gülənin yaşadığı Pensilvaniyanın Seylorsburg səmtində ABŞ hökumətinin "Camaat" üçün ayırdığı geniş bir ərazi var. Bu ərazidə daim ABŞ xüsusi xidmət orqanlarının nəzarətində olan "Nur Camaatının" "Qızıl Nəsil Düşərgəsi" fəaliyyət göstərir. Burada evlər, geniş toplantı salonları, göl və meşəlik var. Orada olduğu müddətdə Suzi Hanseni Gülənin yaxın adamlarından olan düşərgə müdiri Bəkir Aksoy müşayət edir. B.Aksoy söhbət zamanı deyir: "Fətullah Gülən hocaefendi heç bir zaman kiməsə nə etməli olduğunu söyləməz, tövsiyə edər. Əgər bir nəfər Hocaəfəndini görməyə gələr və hocaəfəndi ona Şimal Qütbündə bir kənddə məktəb açmasının yaxşı ola biləcəyini söyləsə, o adam sabahısı gün həmin yerdədir." "The New Republic"in əməkdaşı o gün düşərgənin müxtəlif yerlərindəki insanlar arasında idmanla məşğul olan türklər, işadamları, türkiyədə fəaliyyət göstərən qəzetlərdən birinin jurnalisti və göldə balıq tutan "Nyu York Yəhudi Teologiya Seminariyası"nın professoru ilə bir neçə dəqiqəlik söhbət edə bilib. Söhbət əsnasında öyrənir ki, düşərgədə müxtəlif yaş qruplarından olan gənclər, yeniyetmələr və uşaqlar gündəlik nizamnamə əsasında həyat sürürlər. Onlara xüsusi dərslər və təlimlər keçirilir. "Qızıl nəsil" proyekti və onun detalları haqda bundan artıq məlumat əldə etmək mümkün olmayıb, daha dəqiq desək düşərgənin müdiri buna icazə verməyib, lakin ehtimal olunur ki, bu, gələcəkdə müsəlman ökələri idarə edəcək liderlərin ABŞ-dan ixrac edilməsi planının tərkib hissəsidir.

Türk məktəbləri.
Suzi Hansen Türkiyədəki və Əfqanıstandakı türk məktəblərindən sonra Texasdakı türk məktəbinə getdiyini bildirir. Texasda zənci və Latın Amerikasından olan gənclərin folklor rəqslər edib türkcə şerlər oxuduğunu, onlarla söhbət etdiyini və bu gənclərin hamısının eyni təfəkkür tərzinə malik olduğunu yazır və qeyd edir ki, "sanki onların hamısında eyni beyin var, fərqli dinlərdən və xalqlardan olan gənclərə bir sual verdikdə hamısı eyni şəkildə cavab verirlər... ABŞ-dakı türk məktəblərinin Təbəssüm, Sevgi, Göy qurşağı, Dostluq, Kosmos, Zirvə kimi mücərrəd xoş-beş adları var.."
Daha sonra S.Hansen əlavə edir: "Türk məktəblərində təhsil alan gənc nəslin nümayəndələri, hətta müsəlmanlar da sanki daha liberal, daha amerikalı kimi görünürdü və məncə gələcəkdə "Amerikalı Gülən tərəfdarları" və Türkiyədəkilər arasında siyasi fərqlər meydana gəlməz".

S.Hansen deyir: "Texasda uşaqları F.Gülənin məktəbində təhsil alan üç anadan soruşdum ki, bu məktəbin türk işadamları tərəfindən qurulduğunu bilirsinizmi?
Kolli Obrayan adlı ana özünəməxsus Texas aksentiylə "Aaa, bunu heç düşünməmişdik"" deyir. Analar məktəbdən çox məmnun görünür. Lakin Amerikada çox sayda Gülən məktəblərinə qarşı bəzi yerli media orqanlarında yüngül bir küləyin də başlandığı hiss olunmaqdadır."

Suzi Hansen öz araşdırmasında Anadoluda işadamlarının tədris mərkəzlərinə hədiyyə kampaniyasından Hanefi Avcı hadisəsinə, şəffaflıq məsələsindən "camaat"ın AKP ilə əlaqəsinə qədər bir çox nüanslara da toxunub.
(Araşdırmanın originalını bu linklə əldə edə bilərsiniz http://www.tnr.com/article/world/magazine/79062/global-turkey-imam-fethullah-gulen).
"The New Republic"in əməkdaşı Nurçuluğun maliyyə mənbələrinin çox gizli bir şəkilədə saxlandığını bildirir. Buna görə də o mənbələrdən çox az bir qisminin adını öyrənə bildiyini yazır:1983-cü ildə qurulan "Kaynak Holdinq" 15 ölkədə texnologiyadan inşaata qədər bir çox sektorda fəaliyyət göstərir, Gülənin kaset və diskləri NT satış mərkəzlərində satılır, və bu gün Türkiyə daxilində 110 NT var, Sızıntı, Zaman, Harekat, Samanyolu, Feza Medya Qrup, Bank Asya və TUSKON Fətullah Güləndən alınan "ilhamla" qurulmuşdur.
"Camaatın" 100 ölkədə 1000 məktəbi olduğu deyilir, lakin araşdırmaçı yazar hər zaman getdiyi ölkələrdəki məktəbləri kimin inşa etdirdiyini öyrənə bilmir. Hər zaman aldığı cavab isə "bir xeyriyyəçi" ya da "bir türk işadamı" olur.

P.S. Hər halda bu şəxsin böyük bir toplumun məhəbbətini qazanması bu yazıda qeyd olunmasa da bunu xatırlatmalıyıq. Allah hər bir kəsi öz sevdiyi ilə məhşərə gətirəcək. Hər halda kimsə Fətullah Gülən Hocanı seçibsə bu onun öz işidir. İnşəallah bu yazımızdan ümid edirik ki, nurçu qardaşlarımız da istifadə edəcək, irad və təkliflərini bizə ünvanlayacaqlar.