Bu gün Ankarada keçirilən təntənəli toplantıda Rəcəb Tayyib Ərdoğanın prezidentliyə namizədliyi rəsmən elan olunub.

İslam.az-ın Türkiyə mətbuatına istinadla verdiyi xəbərə görə, Türkiyənin baş naziri, Ədalət və İnkişaf Partiyasının (AKP) lideri Rəcəb Tayyib Ərdoğan avqustun 10-da keçiriləcək prezident seçkilərində iştirak edəcək. Ankarada 4 min nəfərin iştirakı ilə keçirilən təntənəli toplantıda R.T.Ərdoğanın prezidentliyə namizədliyi rəsmən elan olunub.

Ərdoğanın namizədliyini kürsüdən AKP sədrinin müavini, Türkiyə Böyük Millət Məclisinin sabiq sədri Mehmet Əli Şahin elan edib. Onun sözləri zalda alqışlarla qarşılanıb və iştirakçılar ayağa qalxıb. Bundan sonra R.T.Ərdoğanın həyat yolu və siyasi fəaliyyəti haqda sənədli film nümayiş etdirilib.

Ardından toplaşanlara xitab edən baş nazir çıxışını Allaha dua və şükürlə başlayıb, xalqa xidmət edəcəyinə söz verib. Çıxışı zamanı Ərdoğan özünü osmanlı sultanları ilə də müqayisə edib.