Bu gün İraqda nəzarətsizlikdən və xəyanətdən istifadə edərək, müvəqqəti bir-iki şəhəri ələ keçirən, lakin qısa müddətdən sonra oradan çıxardılan İŞİD mediada elə təqdim edilir ki, sanki dünyanın bütün gücləri birləşsə bu terrorçuların öhdəsindən gələ bilməyəcək.

“İŞİD Mosulu aldı, hədəf Kərbəladır”, “İŞİD daha bir neçə şəhəri ələ keçirdi”, “İŞİD Bağdadı aldı” və s. kimi dezinformasiya xarakterli informasiyaları qərb və Türkiyə mediasından götürərək ağına-bozuna baxmadan Azərbaycan mətbuatı da yayımlayır. Bizdə bu xəbərlərə sensasiya kimi yanaşsalar da əslində bu cür xəbərlərin məqsədi “inforrmasi müharibəsində qalib gəlməyə” hesablanıb.

Bir neçə il əvvəl Liviyada eyni hadisələr baş vermişdi. Əl-Cəzirə telekanalının çəkiliş meydanlarında az qala Qəddafinin sarayını tikmişdilər. Müxtəlif aktyorların əl-üzləri qanlı şəkildə yerdə inildəməsi, guya Qəddafi gücləri tərəfindən öldürülən sadə “vətəndaşlar” bir az sonra gülərək ayağa qalxır və icra etdikləri rolun nə dərəcədə uğurlu olub-olmamasına baxırdılar.

Hazırda İŞİD-dən sanki bir qorxuluq düzəldiblər. Lakin əlində silah olan və onu ancaq silahsız, insanlara tuşlayaraq onları öldürməyi bacaran vəhşiləri elə İraqdaca cəhənnəmə vasil olacaqları şübhəsizdir. Lakin onları dəstəkləyən qüvvələr də o qədər avam deyillər ki, İŞİD-in böyüməsinə imkan versinlər. Yəqin ki, bu qüvvələr bir dəfə etdikləri səhvi yenidən təkrarlamazlar. Yəqin ki, ikinci əl-Qaidə yaratmaq heç bu qüvvələrin də maraqlarına uyğun deyil.

Lakin mediada az qala İŞİD-ə bir vaxtlar Osmanlı İmperiyasının ərazilərindən də iki dəfə çox ərazisi olan "dövlət" quranlar görəsən bu "dövlətdə" necə yaşayacaqlarını bilirlərmi? Yoxsa elə düşünürlər ki, bu başkəsənlərin quracağı "dövlətdə" həmin yazarların başlarını sığallayacaqlar.

P.S. Amma hər halda media bu savaşda əsas aparıcı qüvvədir. İnsanları da bəzən media vasitə ilə qorxudub ağcaqanadı fil kimi göstərmək olur. Amma hələ ki, ədaləti qoruyan media orqanları da az deyil. Yəqin ki, bu fitnələrin qarşısında onlar da ləyaqətdə davam gətirə biləcəklər.