Son günlərdə azərbaycanlı gənclərin Suriyaya gedərək bu ölkədə daxili münaqişəyə qoşulması mediada geniş mübahisə mövzusu oldu. Suriyadakı terrorçu qruplara aid saytlarda və sosial şəbəkələrdəki səhifələrdə öldükləri elan edilən azərbaycanlıların daha çox “Ən-Nusra Cəbhəs”i və “Ceyşul-Muhacirin vəl-Ənsar” kimi terrorçu qrupların tərkibində yer aldıqları bildirilir. Öldürülənlərdən bəzilərinin valideynləri və yaxınları bu gənclərin Suriyaya Aşurbəy və Müşfiqabad məscidi tərəfindən göndərildiyini iddia etdilər. Lakin son günlər bəzi saytlar Bəşşar Əsəd tərəfində döyüşən azərbaycanlıların olmasından danışmağa başladı. Ancaq çox tezliklə bütün bu xəbərlərin əsassız, yalan olduğu üzə çıxdı. Həqiqətən də, düşündürücüdür: 200-ə qədər sələfinin ölüm xəbəri verildiyi və fotoları yayıldığı halda, nə üçün mövcudluğu iddia olunan digər dəstənin üzvlərindən birinin ölüm xəbəri təsdiqini tapmır? Niyə bu günə qədər onların valideynlərindən övladlarının Suriyaya getdiyi barədə şikayət eşidilmir?

Təəssüf ki, bu gün Azərbaycan mətbuatında yalan olması əvvəlcədən bəlli olan məlumatları yaymaqda maraqlı saytlar və qəzetlər mövcuddur. Heç bir mənəvi dəyərlə yüklənməyənlərin belə bir addım atmasına bəraət qazandırmaq olmasa da, hər halda anlaşılandı: insanlar zatən mənəvi dəyərlərinə arxa çeviriblər. Amma çox təəssüf ki, bəzən belə bir çirkli oyunlara özlərini Allah adamı kimi qələmə verənlər də qoşulurlar. Hərçənd, yalan danışmaq və yalan məlumat vermək, başqasına böhtan atmaq İslam dini baxımından ən böyük günahlardan hesab edilir. Bu mövzuda istər sünni, istərsə də şiə məzhəbinin davamçıları yekdil fikirdədilər. Bunu islam.az-ın müraciət etdiyi ilahiyyatçılar da təsdiqlədilər.

Hacı İbrahim İbrahimov (Zaqatala-Balakən bölgə qazisi):

- Bu cür yalan və böhtanlar ictimai sabitliyi pozmağa, məzhəb ayrıseçkiliyi, qarşıdurması yaratmağa yönəlib. Bunu yayanlar yaxşı bilirlər ki, yalan və böhtanın günahı nə dərəcədədir. Lakin öz məqsədlərinə çatmaq üçün onlar istənilən addımı atmağa hazırdırlar. Böhtanın böyük günah olması barədə hədislərimiz çoxdur. Məsələn, Əli ibn Əbu Talib buyurur ki, “Böhtan atmaq kimi həyasızlıq və abırsızlıq yoxdur”. Həyasız və abırsız şəxsdən də istənilən fəsadı gözləmək olar.

Təkfirçilərin başbilənləri Suriyada məğlub olduqlarını, bütün dünyada, həmçinin Azərbaycanda ictimaiyyət arasında biabır olduqlarını anladıqları üçün bu cür böhtanları yaymağı əlaltılarına tapşırıblar. Amma bu da nəticə verməyəcək. Çünki “Batil məhv olmağa məhkumdur”.

Hacı Şahin Həsənli (“Məşədi Dadaş” məscidinin imam-cüməsi):

- Ümumiyyətlə yalan və böhtan haqda Quranda və hədislərdə geniş məlumatlar verilir. Əxlaq alimlərinin göstərişlərinə əsaslansaq, yalan böyük günahlardan hesab olunur. Hədislərdə yalan barəsində qeyd olunur ki, “Bütün pislikləri bir evə yığsaq, evin açarı şərabdır”. Davamında isə “yalan ondan da pisdir” buyurulur. Bir insanın barəsində yanlış məlumat vermək, olmayan bir şeyi danışmaq böyük günah, yalan danışmaq isə bütə ibadət etmək kimi hesab olunur.

Hədislərdə qeyd olunur ki, yalan danışmaq Allaha şərik qoşmaq qədər çirkin bir əməldir. Cəmiyyətdə yalan çox olarsa, insanlar arasında biri-birinə qarşı etimad azalır, insanların biri-birinə inamı qalmır. Buna görə də yalan həm də ictimai bir günahdır.

Özlərini dindar kimi təqdim edən insanların yalan danışması daha böyük günahdır. Bu, münafiqliyin əlamətlərindən biridir. Özünü imanlı kimi göstərən insanın başqalarına böhtan atması və yalan danışması ikiqat artıq günahdır, çünki bu insan cəmiyyətə özünü dindar kimi göstərərək, əslində ona olan inamdan sui-istifadə etmiş olur.

Bəzi radikal qüvvələrin guya digər məzhəb nümayəndələrinin Suriyada Bəşər Əsəd qüvvələri tərəfdə döyüşmələri iddiaları yalan və böhtan xarakterlidir, bu iddialara heç bir sübut yoxdur.

İndiyə qədər başqa məzhəblərdən kiminsə gedib Suriyada döyüşdüyünü göstərən bir fakt əldə olunmayıb.

Bildiyim qədər təkfirçilər və onların tərəfdarları saxta siyahı düzəldərək Nardaran və Maştağadan bir neçə adamın adını qeyd ediblər. Lakin bu kəndlərin sakinləri özləri də bunu təkzib etmişlər, hətta bu adlarda heç kimin kənddə yaşamadığını da bildiriblər.

Uzun müddətdir döyüşlər davam edir, radikal qruplaşmalardan nə qədər insanın cəsədinin, ölüsünün şəkili çəkilir göstərilirsə, hələ başqa bir məzhəbdən kiminsə barəsində konkret belə bir görüntü və ya məlumat verilməyib. Yalançı siyahılar uydurub, onu mətbuata ötürmək böyük bir günahdır, ictimai fikri çaşdırmaqdır və bu günahın ictimai fəsadı daha çoxdur.

P.S.Sonda isə yalan məlumatları yayan şəxslərə və mətbu orqanlara imam Hüseynin (ə) Kərbəlada dediklərini xatırlatmaq istərdik: “İmanınız yoxdursa, heç olmasa kişiliyiniz olsun”