Quran açıb gələcəkdən xəbər vermək, hətta gələcəkdə doğulacaq uşağın adına kimi söyləmək mümkündürmü?

Bunu bilək ki, Qurani-kərim fal üçün istifadə edilə bilməz. Fal və gələcəkdən xəbər vermək hansı yolla edilirsə-edilsin, hətta Quranla edilsə belə, haramdır. Quranla yalnız istixarə etməyə icazə verilir. İstixarə o deməkdir ki, insan bir işi edib-etməmək barədə konkret qərara gələ bilmir və bunun cavabını Allahın öhdəsinə buraxır. Təsbeh, ya Quran vasitəsilə, ya da yuxuda ona cavab verilməsini istəyir. Quranla istixarə edən zaman niyyət edib Quranı açırlar, açılan səhifədəki ayənin mənasından təyin edirlər ki, bu işi görmək məsləhətdir ya yox. Diqqət yetirin ki, bu yolla yalnız “hə” və ya “yox” cavabı almaq mümkündür. Bəzi fırıldaqçılar isə “Quran açıb”, gələcəkdə baş verəcək hadisələri bütün xırdalıqları ilə söyləyirlər. Hətta adam adını, məkanı, rəqəmləri belə, deyirlər. Bunlar şarlatanlıqdır və camaatın pulunu mənimsəmək üçün edilir.

Doğulacaq uşağın adına gəlincə, xalq arasında adətə görə, körpənin adını da Quran əsasında qoyurlar. Yəni Quranı açır, açılan səhifədəki ayədən insan adına uyğun olan bir kəlməni seçir və uşağa bu adı qoyurlar. Amma kimsə bir adam üçün guya Quran açıb, “sənin gələcəkdə uşağın olacaq, adını da filankəs qoyacaqsan” deməsi yalan və fırıldaqdır.