Bakıdakı "LUKoil" yanacaqdoldurma məntəqəsinə silahlı basqın etməkdə, ABŞ və Böyük Britaniyanın Azərbaycandakı səfirliklərinə qarşı terror aktı hazırlamaqda və digər cinayətlərdə təqsirləndirilən radikal dini qrup üzvlərinin cinayət işi üzrə məhkəmə prosesi bu gün günün ikinci yarısında davam edib.

Lent.az-ın məlumatına görə, prosesdə təqsirləndirilən və dəstə başçısı sayılan Kamran Əsədovun həyat yoldaşı Səbinə Əsədovanın istintaqa verdiyi ifadə elan olunub. O, ifadəsində göstərib ki, həyat yoldaşı uşaqlarını sevir və bu səbəbdən cinayət törədə bilməz.

Kamran Əsədov isə həyat yoldaşının ifadəsi ilə qismən razı olduğunu bildirib. Təqsirləndirilən şəxs qeyd edib ki, onun həyat yoldaşını dindirmək məqsədilə təqib yolu ilə zorla Gürcüstandan Azərbaycana gətiriblər: "Çox qələt ediblər, qardaşımı gətirib orada ac-susuz saxlayıblar, sonra da ifadəsini alıblar. Mən bunun heyfini çıxacağam. Qohumlarım da, arvadım da bilirlər ki, əqidəm belədir. Yoldaşım mənə ərə gələndə bilirdi ki, kiməm. Mən ona da, valideynlərimə də demişdim ki, Allah yolunda cihad edəcəyəm. Necə ki, mənimlə vuruşurlar, mən də onlarla vuruşacağam".

Daha sonra Kamran Babayevin ifadəsində göstərilən silahlar – "Vincestr" markalı avtomat və bir tüfəng məhkəməyə gətirilərək, onlara baxış keçirilib. Həmçinin, təqsirləndirilən Eqdar Əliyevin mənzilində aparılan axtarış tədbirlərinin video görüntüsü məhkəmə iştirakçılarına təqdim olunub.

Məhkəmə prosesində digər şahidlər – Kamran Əsədovun atası Şakir Əsədovun, Bəxtiyar Orucovun anası Xuraman Orucovanın, Fərid Cabbarovun atası Paşa Cabbarovun istintaqa verdiyi ifadələr elan olunub.

Nəhayət, Bəxtiyar Orucovun həyat yoldaşı Mirvari İbadovanın da ifadəsi elan edilib. O ifadəsində göstərib ki, dəstə üzvlərinin Azərbaycanda cihad etmək haqqında söhbətləri yığıncaqda eşidib. Mirvari İbadova bildirib ki, onu da ibadət yoluna həyat yoldaşı Bəxtiyar Orucov gətirib.

Məhkəmə prosesi fevralın 18-də davam etdiriləcək.