"Yəhova şahidləri" dini sektasını təbliğ edən şəxslər Daxili işlər Nazirliyini (DİN), Xətai rayon Polis İdarəsini və həmin idarənin 34-cü polis bölməsini məhkəməyə verib. Bu barədə Lent.az məlumat yayıb.

Məlumata görə, Moroz Leonid Aleksandroviç, Stepanov Kiril Aleksandroviç, Hüseynov Bəhruz Ramazan oğlu, Niftəliyev Rəşad Hüseyn oğlu, Niftəliyeva Jalə Hüseyn qızı, Hüseynova Günay İsa qızı, Mikayıllı Telman Mərdan oğlu və qeyriləri (ümumilikdə 12 nəfər) Xətai rayon Məhkəməsinə müraciət edərək, qarşı tərəflərə qarşı bir neçə istiqamət üzrə iddia qaldırıb.

İddiaçı tərəf "Yəhova şahidləri" dini icmasından mətbuat vasitəsi ilə üzr istənilməsini, maddi və mənəvi ziyanın ödənilməsini, polis əməkdaşları barəsində intizam tədbirləri görülməsini istəyib.

"Yəhova şahidləri"nə daxil olan şəxslər iddia edir ki, Xətai rayon Polis İdarəsi və həmin idarənin 34-cü polis bölməsi 2006-cı il dekabrın 24-də keçirdiyi əməliyyat zamanı onların hüquqlarını kobudcasına pozub. İddiaya görə, "Yəhova şahidləri" Xətai rayon ərazisində yığıncaq keçirərkən polis həmin tədbiri pozub, otaqlardakı əmlakları müsadirə edib və s. qanunsuz hərəkətlərə yol verilib.

İşə baxan Xətai rayon Məhkəməsi iddianı təmin etməyib. Növbəti instansiya məhkəməsinə üz tutan "Yəhova şahidləri"nin üzvlərini Bakı Apellyasiya Məhkəməsi də sevindirməyib. Bundan sonra onlar Azərbaycan Ali Məhkəməsinə müraciət ediblər.

Məsələ ilə bağlı Xətai rayon Polis İdarəsinin 34-cü polis bölməsindən qarşı tərəfin iddiaları təkzib olunub. Bölmə rəisinin müavini Emil Məmmədov Lent.az-a deyib ki, "Yəhova şahidləri"nin üzvləri məhkəməyə bir deyil, bir neçə dəfə müraciət ediblər. Hər dəfə də onların iddiası təmin olunmayıb. Qarşı tərəfin iddialarını "cəfəngiyyat" adlandıran rəis müavini bildirib ki, 2006-cı il dekabrın 24-də keçirilən əməliyyatda polislə yanaşı Xətai rayon İcra Hakimiyyətinin, rayon Təhsil şöbəsinin, bəzi telekanalların əməkdaşları iştirak edib: "Həmin vaxt İctimai Televiziyada da çəkirdi. İTV-nin kamerası qarşısında necə zor işlətmək olardı? Deyilənlər əsassızdır".

Dini Qurumlarla İş üzrə Dövlət Komitəsinin Dini qurumlarla iş şöbəsinin müdiri Gündüz İsmayılov isə Lent.az-a açıqlamasında məhkəmənin qərarını gözləməyi məsləhət görüb: "Ən son qərarı məhkəmə verəcək, hansı qərar olsa, razılaşmaq lazımdır".

Maraqlıdır ki, "Yəhova şahidləri" dini icma kimi dövlət qeydiyyatından keçməyib, amma məhkəmədə tərəf kimi tanınıb.

İş Ali Məhkəmənin hakimi Əsəd Mirzəliyevin icraatındadır. Məhkəmə prosesi fevralın 13-də keçiriləcək.