Britaniya hökuməti Hollandiya parlamentinin ultrasağçı üzvü, islam dinini təhqir edən "Fitnə" filminin müəllifi Geert Vildersin ölkəyə girməsinə icazə verməyib. Bu barədə Hollandiya XİN-dəki mənbə xəbər verib.

Məlumatda bildirilir ki, Britaniya tərəfi bu məhdudiyyəti ictimai asayişin və təhlükəsizliyin qorunması mülahizələri ilə izah edib. Xatırladaq ki, Britaniyanın Lordlar Palatasının bir neçə üzvü Vildersi "Fitnə"ni nümayiş etdirmək və söz azadlığını müzakirə etmək üçün ölkəyə dəvət etmişdi.

Vilders özünün internet saytında Britaniya hökumətini söz azadlığını qurban verməkdə ittiham edib. "Bu cür halları Səudiyyə Ərəbistanı kimi ölkələrdın gözləmək olardı, nəinki Britaniyadan. Hökumətin bu qorxaq qərarı, sadəcə, biabırçılıqdır", - deyə parlamentari saytında bildirir.

Böyük Britaniyanın XİN-də isə bildiriblər ki, onların ölkəsi ekstremizmin bütün formalarına qarşı çıxır. 2008-ci ilin oktyabrında qüvvəyə minmiş qaydalara görə, hökumət nifrət və zorakılığı təbliğ edən şəxslərin ölkəyə gəlişinə qadağa qoya bilər.

Qeyd edək ki, Amsterdamın Apellyasiya məhkəməsi Vildersin işinə baxacaq. O, dini ayrı-seçkiliyi qızışdırmaqda və müsəlmanları sıxışdırmaqda ittiham olunur. Onun çəkdiyi 17 dəqiqəlik filmdə müqəddəs Qurani-Kərimdəki ideyalar "faşist ideyaları" adlandırılır və qərb mədəniyyəti üçün təhlükəli elan olunur.