Əgər insan məğrib namazını qılarkən səhv edib 3 rükət əvəzinə 4 rükət qılıbsa, nə etməlidir?

Bu namaz batildir. Məğrib namazı yenidən qılınmalıdır. Namazda hər hansı səhvə, unutqanlığa, artıq-əskiyə yol verilərsə, bəzi hallarda onu düzəltmək olar. Bunu adətən ya səhv səcdəsi etməklə, ya da ehtiyat namazı qılmaqla edirlər. Amma bəzi namaz əməlləri var ki, onların sayını istər qəsdən, istərsə də biməyərəkdən artıb-əskildəndə namaz bütünlükdə pozulur. Bu əməllərə “rükn” deyilir. Rüknlərin sayı 5-dir: niyyət, namaza başlayanda deyilən “Allahü əkbər” (təkbirətül-ehram), rükudan əvvəlki qiyam (ayaq üstə durmaq), rüku, qoşa səcdə. Bunlardan hər hansı birini qəsdən ya unutqanlıq üzündən, ya da məsələni bilməmək üzündən etməmək, sayından az və ya çox etmək namazın batil olmasına səbəb olar. 3 rükətlik namazı 4 rükət halında qılan adam bu rüknlərin bir neçəsini lazım olduğundan artıq sayda yerinə yetirmiş olur, ona görə də onun namazı pozulur. Qeyd edək ki, bu o zaman keçərlidir ki, insan rüknlərin sayını artırıb-əskiltdiyini yəqin bilmiş olsun. Bunu yəqin bilməyən, amma şəkk edən adam şəriətdə nəzərdə tutulan qaydalarla (“şəkkiyyat” bölümü) səhvini düzəldə bilər.