Əbu Bəkr məscidinin açılmasına və məscidin dini icmanın fəaliyyətinin bərpa edilməsinə icazə verilməsi xahişi ilə 600 nəfərədək şəxsin imzası ilə prezident İlham Əliyevə, ölkənin güc strukturlarının rəhbərlərinə müraciət edilib. Bu haqda "Media forum" saytına məscidin imamı Qamət Süleyman məlumat verib. Onun sözlərinə görə, müraciət ötən həftə müvafiq ünvanlara təqdim olunub.

Q.Süleyman müraciəti imzalayanların əsasən məsciddə namaz qılan adamlar olduğunu deyir. Müraciətə hələ ki, hər hansı reaksiya olmayıb.

Sentyabrın 26-da Ramazan ayının sonuncu cümə namazını və ayın sonunda bayram namazını Əbu Bəkr məscidində qılmağa icazə verilməsi üçün Dini Qurumlarla İş üzrə Dövlət Komitəsinə göndərilən rəsmi müraciətə gəlincə, indiyədək bu müraciət də cavabsız qalıb.

Q.Süleymanın sözlərinə görə, hazırda polis məscidə nəzarət edir: "Mənim, dini icmanın daha dörd-beş üzünün məscidə girib-çıxmasına mane olmurlar".

Məscidin imamı hesab edir ki, Əbu Bəkrin fəaliyyət göstərməsinin dövlətə, vətəndaşlara heç bir ziyanı yoxdur: "Ora bir Allah evidir və dindarlar yalnız ibadət etmək üçün ora toplaşırlar. Ona görə də istərdik ki, bütün müsəlmanlar üçün müqəddəs hesab edilən Ramazan ayında biz də öz məscidimizdə namaz qılaq, ibadət edək. Bilirəm ki, bizim məscidin bağlı qalmasında maraqlı qüvvələr də var. Amma haqq-ədalətin öz yerini tutacağına, dövlət başçısının tezliklə bizim müraciətimizə cavab verəcəyinə inanıram".

Dini Qurumlarla İş üzrə Dövlət Komitəsinin mətbuat xidmətinin rəhbəri Yaqut Əliyeva "Media forum"a bildirib ki, hazırda məscidin açılıb-açılmaması məsələsinin quruma aidiyyəti yoxdur: "Avqustun 17-də baş vermiş hadisə ilə bağlı istintaq davam edir. İstintaq bitəndən sonra məscidin açılıb-açılmaması məsələsinə baxılacaq. İstintaq davam etdiyindən komitənin bu məsələdə rolundan söhbət gedə bilməz".


Əbu Bəkr məscidi burda terror törədilən gündən bağlıdır. Avqustun 17-də törədilən, iki nəfərin ölümü, bir neçə adamın yaralanması ilə nəticələnən terrorda özünü "Meşə qardaşları" adlandıran radikal dini silahlı birləşmənin üzvləri təqsirli bilinir. Azərbaycanın hüquq-mühafizə orqanları onlardan bəzilərini yaxalayıb. Birləşmənin rəhbəri İlqar Mollaçiyev isə Rusiyanın Dağıstan Respublikasında federal qüvvələrin apardığı əməliyyat zamanı öldürülüb. // "Media forum"