"İslam aləmi Orucluq bayramını oktyabrın 12-də qeyd edəcək". "Turan"a açıqlamasında "Təzə Pir" məscidinin axundu Hacı Faiz Nağızadə qeyd edib ki, bu il Ramazan ayı birinci günü sentyabrın 13-dən olmaqla 29 gün davam edəcək.

Axund orucluğun son günü hər ailədən fitrə verilməsinə də toxunub: "Hələ peyğəmbər zamanından fitrə ödənilməsi arpa, buğda, xurma, düyü ilə olub. Ailənin gəliri imkan verirsə, adambaşına 1 manat fitrə çıxarmaq olar".

O bildirib ki, fitrə şam namazından bayram namazına qədər çatdırılmalıdır, başqa sözlə, oktyabrın 11-i axşam saat 19:15-dən 12-si saat 10:00-a qədər. F.Nağızadə oktyabrın 12-si saat 10:00-da ölkə məscidlərində orucluq bayramı münasibətilə bayram namazlarının qılınacağını deyib.

Bu il Ramazan iki gün - 12 və 13 oktyabr istirahət günü elan edilir. Oktyabrın 13-ü şənbəyə təsadüf etdiyindən bu istirahət günü avtomatik olaraq növbəti iş gününə - oktyabrın 15-nə keçir. Beləliklə, Ramazan bayramı münasibətilə 4 gün - 12, 13, 14, və 15 oktyabr qeyri-iş günləri olacaq.