Hörmətli müsəlmanlar!

Məlumdur ki, İslam dini təmizliyə böyük önəm verir və bizlərə təmizliyə riayət etməyi əmr edir. Təmizlik insanın maddi və mənəvi kirlərdən təmizlənməsi, daxili və xarici zahiri aləminin təmiz olması deməkdir. Dinimizdə təmizlik bir sıra ibadətlərin şərti olduğu kimi, sağlam həyat sürmək üçün də olduqca vacibdir. Təsadüfi deyil ki, Qurani-Kərmin nazil olan ilk ayələrindən biri təmizliklə bağlı olmuşdur. Təmizlik, Allah sevgisini qazanmağa vəsilədir. Qurani-Kərimdə bu barədə "Şübhəsiz, Allah tövbə edənləri, pak olanları sevər" (Bəqərə, 222), bir hədisdə isə "Təmizlik imanın yarısıdır" (Riyazu's-salihin, №25) buyurulmuş, beləcə İslam dininin təmizliyə verdiyi önəm göstərilmişdir.

Əziz möminlər!

Dinimizin istədiyi təmizliyə, həm maddi, həm də mənəvi aspektdən yanaşmaq lazımdır. Maddi təmizlik insanın vücudu, paltarı, yeməyi-içməyi, ətrafı və istifadə etdiyi hər şeyi təmiz saxlaması deməkdir. Geyim və qida təmizliyi haqqında Qurani-Kərimdə "Paltarını da (daim) təmiz saxla" (Muddəssir, 4), başqa bir ayədə isə "Ey insanlar! Yer üzündəki qidaların təmiz, halal olanlarını yeyin, şeytanın izi ilə getməyin" (Bəqərə, 168) buyurulmuşdur. Bu ayələrdə geyim təmizliyinə, sağlam və halal qidalarla qidalanmanın vacibliyinə diqqət çəkilmişdir.

Həzrəti Peyğəmbər (s.ə.s.) isə: "Paltarlarınızı yuyun, təraş olun, dişlərinizi təmiz saxlayın, gözəl və təmiz olun" (Muxtaru'l-əhadis, 202) buyuraraq təkəbbürə səbəb olmamaq şərtilə hər zaman təmiz və düzgün geyinməmizi istəmişdir.

Gördüyümüz kimi, İslam dini vücud təmizliyinə və baxımına lazımi önəmi verməkdə, kir içində yaşamaqdan çəkindirməkdədir. Dinimiz yuyunub təmizlənməyi, bədənin təmizliyinə fikir verməyi də israrla tələb edir. Sevimli Peyğəmbərimiz (s.ə.s.) bir hədisində "Bədəninizi təmiz saxlayın" buyurmuş və "Allah sizi təmiz qullarından etsin" (Muxtaru'l-əhadis, 737) deyə dua da etmişdir.


Hörmətli möminlər!

Maddi təmizliyin yuxarıda sadalanan ünsürlərinə riayət etməklə yanaşı, mənəvi təmizliyimizə də fikir verməliyik. Mənəvi təmizlik dinimizin qadağan etdiyi bütün pisliklərdən və bu pisliklərə aparan bütün səbəblərdən uzaq durmaq, bizi əməlisalehliyə və kamilliyə qovuşdurmağa əngəl olan mənfur duyğuları qəlbimizdən silmək, ibadətləri yerinə yetirmək, riyadan çəkinmək, haramlardan və qadağan olunmuş şeylərdən uzaq durmaq deməkdir.

Belə bir təmizlik isə ancaq İslam dinin əmr etdiyi maddi və mənəvi təmizliyə diqqət etməklə mümkün olar. İslam dini gözəllik, yaxşılıq, asanlıq və təmizlik dinidir. Elə isə, fərd və cəmiyyət olaraq həyatınız boyu təmizliyə son dərəcə önəm verməliyik. İbadət anında olduğu kimi, cəmiyyət içində də hər kəsin xoş görəcəyi bir təmizliyə sahib olmalıyıq. Unutmamalıyıq ki, təmizliyə riayət edən müsəlmanlar Allah qatında məqbul, insanların gözündə isə mötəbər şəxslər olurlar.



Aqil HACIYEV ([email protected])